UJENZI WA JENGO LA MIONZI HOSPITALI YA WILAYA UTETE

Start Date: 2021-10-28

End Date: 2022-06-25

Katika mpango wake wa fedha za bakaa za Mapato ya ndani, Halmashauri ya Wilaya ya Rufiji ilitenga Kiasi cha Shilingi 40,000,000.00 kujenga Jengo la Mionzi katika Hospitali ya Wilaya ya Utete.  Lengo la mradi huu ni kutoa huduma za mionzi katika Hospitali ya Wilaya na kuwaondolea adha Wananchi wanaosafiri umbali mrefu kwenda Wilaya za jirani hasa Kibiti (Hospitali ya Mchukwi) na Mkuranga kwa ajili ya  kufuata huduma hii. Hata hivyo Jengo lililokuwa linatumika hapo awali lilikuwa chakavu sana  hivyo kushindwa kuhimili kutumika kwa ajili ya kutoa huduma hiyo. Ndipo Mkururugenzi  Mtendaji wa Halmashauri ya Wilaya ya Rufiji kwa kuliona hilo  aliamua kutoa fedha za zilizovuka  mwaka wa fedha 2020/2021  ili ziweze kutumika kujenga Jengo jipya la mionzi.

Ujenzi wa Jengo la mionzi  ulianza tarehe 28.10.2021 na ulitakiwa kukamilika mnamo tarehe 20.03.2022 hata hivyo kikao cha Kamati ya ujenzi cha tarehe 12.04.2022 kilikubaliana kuongeza muda wa kukamilisha mradi huu mpaka tarehe 25.06.2022.

Mradi umechelewa kukamilika kutokana na mabadiliko yaliyotokea kwenye ‘structure’ nzima ya Jengo wakati wa utekelezaji wa Mradi. Awali ilikusudiwa kujenga chumba cha mionzi tu ili huduma ianze kutolewa.  Lakini changamoto iliyojitokeza ni ugumu wa uezekaji kwa vyumba vichache ambavyo ni sehemu ndogo tu ya Jengo zima, ambapo ingetulazimu kubomoa tena baada ya kukamilisha eneo liliobaki la Jengo.

Hata hivyo ili kutatua changamoto hiyo, kamati ya ujenzi kupitia kwa Mkurugenzi Mtendaji wa Halmashauri ya Wilaya ya Rufiji ilipeleka ombi kwenye Kamati ya fedha, Mipango na Utawala ya Halmashauri la kubadilisha matumizi ya  kiasi cha Shilingi 100,000,000.00  zilizokuwa zimetengwa hapo awali kwa ajili ya ununuzi wa mashine ya mionzi zitumike kukamilisha ujenzi wa jengo zima la mionzi badala ya kujenga vyumba vichache tu kama ilivyoelezwa hapo juu. Kamati ya Fedha, Mipango na Utawala iliridhia ombi hilo, hivyo kufanya jumla ya gharama za mradi wa Jengo la mionzi mpaka utakapokamilika kuwa Shilingi 140,000,000.00

 Mradi huu unatekelezwa kwa mfumo wa “force account”. Ambapo Fundi aliyeshinda zabuni ni Jeshi la Magereza Utete. Mpaka sasa kiasi cha Shilingi 32,276,000,00 zimetumika ikiwa  malipo ya fundi ni Shilingi 3,500,000.00 na  ununuzi wa vifaa vya ujenzi kiasi cha Shilingi 29,276,000.00.

Kamati ya ujenzi inatoa shukurani za dhati kwa Mkurugenzi  Mtendaji wa Halmashauri ya Wilaya ya Rufiji kwa kufanya ufuatiliaji wa karibu wa mradi huu na kuhakikisha wataam na wakuu wa Idara wanaohusika na mradi huu wanafanya ufuatilaji wa karibu na  kutatua changamoto zinazojitokeza ili mradi uweze kukamilika kwa wakati.

 Pia tunawashukuru wataalam kutoka OR – TAMISEMI pamoja na majukumu mengi mliyokuwa nayo lakini mmefika katika Halmashauri ya Wilaya ya Rufiji hasa Hospitali ya Wilaya - Utete na kujionea mazingira yetu ya utendaji kazi.