Historia

UTANGULIZI

Halmashauri ya Wilaya ya Rufiji ni mojawapo ya Halmashauri tisa za Mkoa wa Pwani.  Kwa upande wa kaskazini imepakana na Halmashauri za Wilaya za Kisarawe na Kibiti, upande kusini imepakana na Halmashauri ya Wilaya ya Kilwa kwa upande wa Mashariki imepakana na Halmashauri ya Wilaya ya Kibiti, Kwa upande wa Magharibi imepakana na Mkoa wa  Morogoro.

 MAUMBILE YA ARDHI NA HALI YA HEWA.

Wilaya ya Rufiji imegawanywa na mto mkubwa wa Rufiji utokao Magharibi na kuelekea Mashariki kwenye bahari ya Hindi. Maumbile ya ardhi ya Wilaya hii yamegawanyika katika kanda kuu mbili. Kanda ya bonde la mafuriko la mto Rufiji (Flood Plain), ni ukanda unaopata mafuriko mara kwa mara ukiwa na urefu wa km. 130 kutoka Magharibi hadi Mashariki na upana wa wastani kati ya km. 7-35, kuna mabwawa/maziwa (oxbow lakes) zaidi ya 13, ukanda wa pili ni ukanda wa juu/milimani. Wilaya ya Rufiji inapata wastani wa milimita 800 – 1,200 za mvua kwa mwaka. Wastani wa kiwango cha chini cha joto ni digrii 20 sentrigredi na kiwango cha juu ni digrii 33 sentrigredi

 TAKWIMU NA TAARIFA MUHIMU

Halmashauri ya wilaya ya Rufiji ina ukubwa wa Kilometa za mraba 9,485 kwa eneo la maji na nchi kavu.  

Halmashauri ya wilaya ya Rufiji inaundwa na kata 13, vijiji 38 na vitongoji 177 (kwa mujibu wa Sensa ya watu na makazi ya mwaka 2012 ina wakazi   94,626 (wanaume 45,683 na wanawake 48,943) na ongezeko la watu kwa mwaka ni asilimia 0.7. Kwa makadirio mwaka 2017 Wilaya ina wakazi 106,227 (wanaume 51,284 na wanawake 54,943) wastani wa watu 4.4

HALI YA UONGOZI

Katika uchaguzi mkuu uliofanyika tarehe 25/10/2015, matokeo ni kwamba Mbunge aliyechaguliwa ni kutoka Chama cha Mapinduzi (CCM).  Kwa upande wa madiwani jumla ya madiwani 18 walichaguliwa ambapo kutoka Chama cha Mapinduzi wapo 10 na kupitia chama cha wananchi CUF wapo madiwani 8. Aidha, kwa upande wa Madiwani wa Viti Maalum wapo 5 ambapo 3 wanatoka chama cha Mapinduzi CCM na 2 kutoka chama cha wananchi CUF

HALI YA MAENDELEO YA WILAYA KWA UJUMLA (SHUGHULI ZA KIUCHUMI)

Inakadiriwa kuwa karibu asilimia 95% ya wakazi wa wilaya ya Rufiji wanajihusisha na shughuli za kilimo na uvuvi. Mazao makuu ya biashara ni korosho na ufuta. Kwa upande wa mazao ya chakula ni mahindi, mpunga, mihogo mikunde. Asilimia 5% ni watumishi katika serikali kuu, Halmashauri, mashirika ya umma na binafsi. Kwa wastani pato la kila mwananchi kwa mwaka (per capital income) ni Tshs. 1,272,855/= Wastani wa watu kwa kaya ni 4.4