MIFUGO ITAKAYOKUWA NJE YA RANCHI KUKAMATWA

Posted on: December 29th, 2025

Mkuu wa Wilaya ya Rufiji Mhe. Luteni Kanali Fredrick Komba amesema kuanzia Disemba 31, 2025 ataanza oparesheni ya kukamata mifugo yote itakayofugwa nje ya ranchi (maeneo yaliyotengwa na serikali kwa ajili ya Shughuli za ufugaji), ili kupunguza kero ya mara kwa mara kati ya Wafugaji na Watumiaji wengine wa ardhi, ambayo ni kero kubwa kwa Wananchi wa Rufiji.

“kesho tarehe 30 ndo terehe ya mwisho, kuanzia terehe 31 kamati ya usalama tayari nishasaini maelekezo ya kuanza kukamata mifugo yote ambayo itakuwa nje ya ranchi” alisema DC.

Mkuu huyo wa ulinzi na usalama wa Wilaya alitoa kauli hiyo jana Disemba 29, 2025 baada ya kupokea kero hiyo kutoka kwa Wananchi wa Kata ya Shela na Kata ya Chumbi katika ziara yake ya kikazi ya kuhamasisha ulimaji wa zao la korosho, ambapo miche 1, 500,000 inakwenda kugaiwa bure kwa Wananchi wa Rufiji kwa lengo la kuongeza uzalishaji wa zao hilo na kukuza uchumi wa Rufiji.

Mhe. Komba aliongeza kwa kusema kuwa swala la ranchi ni sera ya kitaifa, na adhima ya Serikali ni kuona Mfugaji anakaa kwenye maeneo yaliyotengwa na Serikali kwa ajili ya shughuli za ufugaji ili kuepusha migogoro kati ya Wafugaji na Watumiaji wengine wa ardhi, na sio kumkandamiza Mfugaji, huku akiwasisitiza Wafugaji ambao mpaka Sasa hawajachukua ranchi kuweka mifugo yao kwa Wafugaji waliochukua ranchi wakati wakishugulikia swala la ranchi.

Mhe. Komba alitumia takribani mwaka mmoja kwa ajili ya kutoa elimu kwa Wafugaji ya kuwataka wakae kwenye maeneo maalumu ya shughuli za ufugaji yaliyotengwa na Serikali kwa ajili ya kupunguza migogoro ya mara kwa mara inayojitoleza katika Wilaya hiyo.