WAFUGAJI RUFIJI WAPEWA WIKI MBILI KUPELEKA MIFUGO KWENYE LANCHI

Posted on: December 1st, 2025

Mkuu wa Wilaya ya Rufiji Mhe. Luteni Kanali Fredrick Komba ametoa wiki mbili kwa Wafugaji kuhakikisha mifugo yao inakaa kwenye lanchi (maaeneo Maalum yaliyotengwa na Serikali kwa ajili ya ufugaji) ili kuepusha migogoro kati Wafugaji na Watumiaji wengine wa ardhi.

Mhe. Komba alitoa maagizo hayo Jana Disemba 1, 2025 wakati akizungumza na Wafugaji katika Ukumbi wa FDC- Ikwiriri.

"kuanzia leo mpaka Disemba 15 mwaka huu Kila Mfugaji mifugo yake ikae kwenye lanchi, sitaki kusikia Mfugaji anaenda kulisha kwenye shamba la Mkulima" alikemea DC.

Vile vile Mkuu huyo wa Ulinzi na Usalama wa Wilaya, ametoa siku 30 kwa Wafugaji ambao mpaka Sasa hawajachukua lanchi, huku akiwataka mifugo yao kuihifadhi kwa Wafugaji ambao tayari wana maaeneo ya kufugia mpaka pale watakapopata maeneo yao, ili kuepusha migogoro ya mara kwa mara.

Maamuzi hayo yamekuja baada ya awali DC kutoa miezi mitatu kutoka Septemba mpaka Novemba 30, 2025, Kila Mfugaji alitakiwa awe kwenye lanchi, ambapo bado wapo baadhi ya Wafugaji ambao hawajachukua lanchi.

Katika hatua nyingine ya Ulinzi na Usalama, Mhe. Komba amewataka Wananchi wa Rufiji kulinda amani ya Wilaya hiyo na kuepuka kujihusisha na uvunjifu wa amani huku akiwataka kutoa taarifa endapo wataoana Kuna dalili za uvunjifu wa amani.