TAARIFA YA UJENZI WA KITUO CHA AFYA NGARAMBE

Start Date: 2022-04-02

End Date: 2022-07-02

Halmashauri ya Wilaya ya Rufiji kwa mwaka wa fedha 2021/2022 ilipokea Fedha kiasi cha Shilingi. 250,000,000.00 kutoka Serikali Kuu (Fedha za Tozo ya miamala ya Simu), kwa ajili ya kuanza ujenzi wa Kituo cha Afya Kata ya Ngarambe. Fedha hizi zilielekezwa kujenga Jengo la Wagonjwa wa nje (OPD), Jengo la maabara pamoja na  kichomea taka.

Ujenzi wa Kituo cha Afya Ngarambe ulianza tarehe 02/04/2022 kwa majengo mawili yaani Jengo la Wagonjwa wanje (OPD) na Maabara, na unatarajiwa kukamilika mnamo tarehe 02/07/2022. Mafundi waliopewa kazi ni Faridu Mbulu na Modestus Kayombo. Mpaka sasa fedha iliyotumika ni Shilingi 67,320,000.00 kwa ununuzi wa vifaa na malipo ya mafundi. Nguvu za wananchi katika utekelezaji wa mradi huu inakadiriwa kuwa Kiasi cha Shilingi 4,650,000.00 kwani walijitolea ardhi yenye ukubwa wa ekari kumi (10) na kusafisha eneo la ujenzi. Vilevile wananchi wanajitolea kusimamia utekelezaji wa mradi huu kupitia kamati mbalimbali za ujenzi zilizoundwa ambapo wao ni wajumbe wa kamati hizo. Fedha iliyobaki mpaka sasai ni kiasi cha Shilingi. 182,680,000.00.

 Mpaka sasa Jengo la maabara  lipo hatua linta na  Jengo la OPD lipo hatua ya kuinua kuta.

Ujenzi wa Kituo cha Afya Ngarambe utasaidia sana Wananchi wanaosafiri umbali wa kilometa zaidi ya sitini (60km) kwenda kutibiwa katika hospitali ya Wilaya iliyopo Utete. Pia itasaidia sana kupata   huduma za dharula kwa Wajawazito.  Hivyo tunategemea kupunguza sana vifo kwa kina Mama wajawazito na Watoto chini ya miaka mitano mara tu Kituo kitakapokamilika na kuanza kufanya kazi.

Changamoto kubwa iliyopo katika utekelezaji wa mradi huu ni ubovu wa miundombinu hasa barabara, ambayo inaleta ugumu katika usafirishaji wa vifaa vya ujenzi. Hali hii inapelekea kupanda kwa gharama ya usafirishaji wa vifaa vya ujenzi mpaka eneo la mradi na kusabisha mabadiliko ya gharama zinazokuwa zimekadiria hapo awali. Hata hivyo wananchi wamekuwa wanajitolea hata kubeba vifaa vya ujenzi kwa kutumia baiskeli pale gari inaposhindwa kufikisha vifaa hivyo eneo la mradi kutokana na ubovu wa barabara.

Changamoto nyingine kubwa ni ukosefu wa maji karibu na eneo la mradi ambapo maji yanapatikana umbali wa zaidi ya kilomita 3 kutoka eneo la mradi. Ofisi ya Mkurugenzi Mtendaji wa Halmashauri ya Wilaya ya Rufiji imetoa guta (pikipiki ya miguu 3) ili iweze kusaidia kuchota maji na kuhakikisha yanapatikana muda wote katika eneo la Mradi.

 Wananchi wa Kata ya Ngarambe tunapenda Kumshukuru sana Mkururgenzi Mtendaji wa Halmashauri ya Wilaya ya Rufiji kwa ufuatilaji wa mara kwa mara na kuhakikisha wataalamu wa Halmashauri wanakuwepo eneo la mradi bila kujali umbali uliopo Zaidi ya kilomita 60 kutoka makao makuu ya Wilaya. Pia tunapenda kumshukuru Mh. Mbunge wetu wa Jimbo la Rufiji kwani amekuwa akitutembelea kila anapopata nafasi na kutuhimiza kusimamia vizuri mradi huu ili uweze kuleta tija kwetu. Tunapenda kuwashukuru wageni wetu kwa kuweza kufika katika Kata ya Ngarambe bila kujali umbali wala changamoto iliyopo ya ubovu wa barabara.

 Mwisho kabisa tunapenda kumshukuru Mh.Rais  Samia Suluhu Hassan kwa kutuletea mradi huu mkubwa katika katika Kata yetu. Ama kwa hakika kama jina lake ametuletea, suluhisho la ukosefu wa huduma bora za Afya kwa Zaidi ya miaka 60 tangu kupata Uhuru.

Baada ya kusema hayo tunawaomba wageni wetu mpite na kukagua maendeleo ya ujenzi.