WAZAZI WAHIMIZWA KUPELEKA WATOTO SHULE

Posted on: November 23rd, 2023

Mkuu wa Wilaya ya Rufiji Meja Edward Gowele, amewataka Wazazi pamoja na Walezi kuwapeleka watoto Shule, pamoja na kusimamia mahudhurio yao pindi wanapotoka Shuleni.

DC Gowele ameyasema hayo Novemba 21, 2023 katika mkutano wa hadhara na Wananchi wa Kitongoji cha Kitapi, Kata ya Mbwara Wilayani Rufiji muda mfupi baada ya kuitembelea Shule ya Msingi Kitapi, ikiwa ni ziara yake ya kusikiliza na kutatua kero za Wananchi.

“Mheshimiwa Rais anajenga madarasa itakuwa ni bure kama hatuwapeleki Watoto Shule, leo mmesema hamna mganga wa kike hapa, tusomeshe Watoto wa kike waje watuhudumie, tukikosa kuwapeleka hawa Watoto Shule tutakosa Watu wa kuja kutuhudumia, tuhakikishe tunawasimamia Watoto kwenda shule (mahudhurio), tusiozeshe Watoto kabla ya wakati” Amesisitiza DC Gowele.

Akijibu kero za umeme, pamoja na changamoto ya mawasiliano katika Kitongoji hicho amesema atamuagiza Meneja wa TANESCO na TTCL wafike katika eneo hilo ili kuangalia namna ya kutatua tatizo hilo.

Vilevile Gowele amewataka Wananchi kutoa taarifa endapo katika eneo lao wanamashaka na Mtu ambaye hawamfahamu ili kudhibiti uhalifu.