WAPENDA RUSHWA WAONYWA

Posted on: January 17th, 2023

Na. Emmanuel Kapandila - Rufiji

Mkuu wa Wilaya ya Rufiji Meja Edward Gowele ametoa onyo kali kwa Wafanyabiashara hususani wauzaji wa vifaa vya ujenzi kujihusisha na vitendo vya Rushwa na kuwa hatomfumbia macho yeyote atakayebainika anajihusisha na vitendo hivyo hususani katika uuzaji wa vifaa kwa miradi ya Serikali.

Meja Gowele ametoa onyo hilo  Januari 17. 2023 katika kikao cha baraza la biashara la Wilaya kilichofanyika katika ukumbi wa Halmashauri Utete Wilayani Rufiji.

“Tutakapokugundua hufanyi biashara Kwa uaminifu . hatutakufunmbia macho. Ni lazima tuhakikishe wote tunaongeza kasi ya ukuaji wa uchumi kwa kujibidiisha na kujipatia kipato kwa njia  halali.  Tusiwaumize wananchi wetu. Rasilimali tulizonazo ni lazima tuzisimamie kwa mujibu wa sheria” Alisisitiza Meja Gowele.

Awali akitaja changamoto za Mapato Afisa Kodi Mamlaka ya Mapato Tanzania (TRA) Bw. Malegi Duba amesema changamoto ya ukosefu wa elimu ya kutosha juu ya ulipaji kodi, na kutokuwepo kwa uaminifu kwa baadhi ya wadau wanaolipa kodi, pamoja na kuingiza bidhaa kwa njia za magendo imekuwa ni sabau kubwa ya kuinyima mapato serikali kiasi cha kukosa mapato ambayo yangeweza kutumika kuboresha miundombinu ya kibiashara.

“walipa Kodi wengi hawataki kuwa wazalendo Kwa kufungua biashara na kukadiriwa mapato Yao. Wote wanatakiwa kutambua kuwa kulipa kunatoa fursa ya kuboresha miundombinu ya kuongeza mapato katika biashara na huduma kwa ujumla.” Alisema Duba.

Kwa Upande wake kamanda wa TAKUKURU Wilaya ya Rufiji Marcus Mlaponi amewataka wafanyabiashara kuwa waaminifu na kutumia uaminifu kama fursa ya kuichangia Serikali katika utekelezaji wa miradi ya maendeleo kupitia kamati zinazoundwa kusimamia miradi hiyo.

     “ niwaombe wafanya biashara. ninyi mkikataa Kufanya udanganyifu zile Kamati hazitaweza Kufanya udanganyifu na tutaokoa fedha nyingi zinazopotea . tuone ni fursa kwamba tukifanya biashara Kwa uadilifu tunatengeza mchango Kwenye miradi ya Serikali. " udanganyifu unaofanyika ni kosa la jinai. tusiweke Bei za Serikali  na wanunuzi wakawaida zikawaida .” alisistiza kamanda wa TAKUKURU

Wadau wa Biashara wameomba kuongezeka kwa kasi ya utoaji wa elimu ya biashara huku wakiomba kutazamwa upya Kwa baadhi ya viwango vya Kodi.