WANANCHI RUFIJI WAPATA MAFUNZO YA UMILIKI WA ARDHI.

Posted on: January 31st, 2024

Wakati wiki ya sheria ikiadhimishwa nchini, Wananchi wa Kata ya Chemchem Wilayani Rufiji Mkoani Pwani wamepata semina ya mafunzo ya namna ya bora ya kumiliki ardhi kihalali kwa kupata hati miliki, hali itakayosaidia kupungunza migogoro ya ardhi katika maeneo wanayoishi.

Mafunzo hayo yametolewa leo Januari 31, 2024 katika Shule ya sekondari ya Chemchem ikiwa ni kampeni ya Linda Adrhi ya Mwanamke iliyoandaliwa na mashirika mbalimbali ikiwemo Jukwaa la Ardhi Tanzania, Shirika la kutetea haki za binadamu LHRC na Shirika linalofanya kazi na serikali na mashirika ya ndani kupata haki za sheria za ardhi kwa familia masikini, LANDESA.

Wananchi Walitumia semina hiyo kuuliza maswali ili kuepuka migogoro ya ardhi, ambapo Mkazi wa Kitongoji cha Utunge Kata ya Chemchem Rahimu Matimbwa alitaka kujua ni ipi haki ya mtu aliyeishi katika eneo kwa kufuata taratibu za umiliki wa ardhi na baadae eneo hilo limeingia kwenye mamlaka ya mji mdogo.

“kwa mfano sisi tumeingia kwenye mamlaka ya mji mdogo, kuna Mwanakijiji kabla ya kuingia alipimiwa (ardhi) na alifuata taratibu zote na baadae mji umetolewa umeingia kwenye mamlaka ya (mji mdogo), je zile taratibu za kumiliki ile ardhi yake bado zipo au zinakufa?” aliuliza Matimbwa.

“kama ulipima na ukawa na ramani yako, tukiamisha mji unachukua zilezile, ila wale wengine hawatopata hati kama hawana ramani” Nyendo Kaombwe alijibu Afisa Ardhi Rufiji.

Katika hatua nyingine, Mratibu wa jukwaa la ardhi Benard Baha, amewashauri wanawake kujitokeza kugombea nafasi mbalimbali za uongozi na kufanya maamuzi ya kimaendeleo.

Akitoa shukrani na pongezi kwa wawezeshaji wa kampeni hiyo baada ya mafunzo baadhi ya Wananchi akiwemo Hamada Mpitu amesema amepata somo kwamba haki ni sawa kati ya mwanamke na Mwanaume.