‘Wananchi Msikae mabondeni, mtoke huko muache ubishi’ Mwaluseke.

Posted on: November 3rd, 2023

Mkuu wa Jeshi la Zimamoto na Uokoaji Wilaya ya Rufiji Mkoani Pwani, Inspekta Henry Mwaluseka amewataka Wananchi wanaokaa maeneo ya mabondeni (maeneo ambayo ni njia ya maji) kuhama katika maeneo hayo, ikiwa ni tahadhari dhidi ya mvua zanazoendelea kunyesha.

Amesema kutokana na utabiri wa Mamlaka ya hali ya hewa nchini (TMA) msimu huu kutakuwa na mvua nyingi (el-nino).

“lakini pia mvua inaponyesha usikae shambani ukaendelea kufanya kazi, wala msikae chini ya miti, hiyo ni hatari!. Na yatakapotokea maafa toeni taarifa kwenye serikali yenu ya Kijiji, pia Msikae maeneo ya mabondeni, tuondoke huko ndugu zangu muache ubishi, roho haina spea” Amesema Mwaluseka. 

Mwaluseka ameyasema hayo wakati akizungumza na Wananchi wa Kijiji cha Muhoro Kata ya Muhoro leo Novemba 3, 2023 ikiwa ni ziara ya Kamati ya Maafa ya Wilaya ya Rufiji yenye lengo la kutoa elimu ya tahadhari kwa Wananchi juu ya mvua kubwa zinazoendelea kunyesha.

Akiendelea kusisitiza juu ya suala hilo Katibu wa Kamati hiyo, Semeni Mbigo amewasihi Vijana kuacha tabia ya kupiga picha na kutoa taarifa za maafa kwenye Mitandao ya Kijamii, badala yake watoe taarifa kwa uongozi wa Kijiji.

Ziara ya Kamati hiyo itaendelea kesho kuelekea kata ya Mwaseni.