Wakuu wa Idara na Vitengo Halmashauri ya Wilaya ya Rufiji

Posted on: August 18th, 2017

Wakuu wa Idara na Vitengo wa Halmashauri ya Wilaya ya Rufiji wakisikiliza kwa makini Taarifa za Mkutano wa mwaka 2016/2017 wa Baraza la Madiwani.

Katika Mkutano huo Waheshimiwa madiwani walihoji mambo kadhaa ili kupata ufafanuzi wa kiutendaji au kitaalam; miongoni mwa mambo hayo yaliyoulizwa na madiwani ni pamoja na:-

Swala la mali chakavu za Halmashauri, ni kwa nini zisiuzwe ili zipatikane pesa kiasi zitumike katika shughuli nyingine za kimaendeleo ndani ya Halmashauri. Akijibu hoja hiyo Mkurugenzi wa Halmashauri ya Wilaya ya Rufiji ndg: Rashidi S. Salum alisema kuwa mali chakavu zote za Halmashauri zitapigwa mnada wa hadhara kuanzia tarehe 31 Agosti 2017 hadi 02 Septemba 2017. Tayari tangazo la mnada huo limeshatangazwa kwenye vyombo vya habari yakiwemo magazeti, tovuti ya Halmashauri na ubao wa matangazo wa Halmashauri ya Wilaya ya Rufiji. Kwa mwananchi yeyote anayehitaji kupata taarifa zaidi kuhusu mnada huo atembelee ubao wa matangazo au tovuti ya Halmashauri. 

Vitambulisho vya wazee kwa ajili ya kupata huduma ya Afya bado inaonekana ni changamoto baada ya kugundulika kuwa vitambulisho hivyo vimetolewa kwa baadhi ya wazee (560 kati ya 3000) katika kata 3 tu wakati Halmashauri ina jumla ya kata 8. Madiwani walihitaji kujua ni kwa nini kazi hiyo ya kuwatengenezea vitambulisho vya Bima ya  Afya wazee imeonekana kuchukua muda mrefu. Katika kujibu hoja hiyo kaimu mganga mkuu Wilaya ndg: Rasmo Msabaha alisema kuwa idara ya Afya inaendelea kuwasajili wazee ili wpate vitambulisho. Hata hivyo alifafanua kuwa hakuna mzee aliyewahi kutembelea kituo chochote cha kutolea huduma za kiafya akakosa huduma kwa sababu ya kutokuwa na kitambulisho. Alisema kuwa tatizo lililosababisha baadhi ya wazee kuchelewa kupata vitambulisho ni kwa sababu ya baadhi ya vituo vya kutolea huduma kuishiwa kadi maalum kwa ajili ya kutengeneza vitambulisho hivyo; lakini alisisitiza kuwa ufuatiliaji wa kina unaendelea kuhakikisha kwamba karatasi hizo zinapatikana na wazee wanatengenezewa vitambulisho vya Bima ya Afya mapema kabla ya mwezi Desemba 2017. 

Uchaguzi wa Makamu mwenyekiti wa Halmashauri na Kamati za kudumu za Halmashauri. Nafasi ya Makamu mwenyekiti wa Halmashauri iligombewa na mgombea mmoja tu mhe: Hawa Mtopa ambaye ndiye pia alikuwa anamaliza muda wake (mwaka mmoja madarakani) akiwa kama Makamu mwenyekiti.  Hivyo ilimlazimu kujiuzulu kwanza nafasi hiyo na baadae alipigiwa kura za siri za ndiyo au hapana. Kura zilizopigwa zilikuwa kura 16; kati ya hizo ndiyo zilikuwa 10 na hapana 6 hivyo mhe: Hawa Mtopa alifanikiwa kutetea nafasi yake ya Makamu mwenyekiti wa Halmashauri kwa mwaka wa fedha 2017/2018.

Wajumbe wa kamati za kudumu za Halmashauri waliopatikana ni kama ifuatavyo:-

Huduma za jamii

        R. Mtumbange (Mwenyekiti), H. Momboko, L. Mpembenue, S. Mikengesi, A. Ndungutu, N. Chamwenyewe, A. Mduma, K. Kisoma, S. Malenda

Maadili

        S. Mikengesi, K. Kisoma (Mwenyekiti), L. Mpembenue, T. Mapengo, R. Mege

Uchumi, Ujenzi na Mazingira

         J. Ligomba (Mwenyekiti), S. Mbwilani, T. Mapengo, J. Mlanzi, R. Mege, S. Malenda, S. Mtindugo, H. Mtauka 

Ukimwi

          H. Mtopa, H. Mtauka, J. Mlanzi

Fedha

          H. Mtimbuko, A. Ndungutu, Mwenyekiti wa Halmashauri na wenyeviti wa kamati zote za kudumu.