WAJUMBE WA BARAZA LA ARDHI NA NYUMBA RUFIJI WAAPA RASMI, WASISITIZWA KUTENDA HAKI

Posted on: March 27th, 2024

Mkuu wa Mkoa wa Pwani Mhe. Abubakar Kunenge, amewaapisha Wajumbe  wa nne wa baraza la ardhi na Nyumba la Wilaya ya Rufiji, litakalokwenda kufanya maamuzi ya migogoro mbalimbali ya ardhi Wilayani humo ili kupunguza migogoro.

Hafla hiyo fupi ya kuwaapisha Wajumbe hao, imefanyika katika ukumbi wa Chuo cha Maendeleo ya Wananchi (FDC) Ikwiriri, jana machi 27, 2024 ambapo Wajumbe walioapishwa ni pamoja na Aminu Lipunda, Zainabu Ngalemera, Salum Kipoloya na Salum Kilemba.

Kunenga, amesema baraza hilo lipo kwa mujibu wa sheria ya utatuzi wa migogoro ya ardhi, huku akiwasisitiza Wajumbe hao kutenda haki kwa mujibu wa sheria, kanuni na miongozo na kuwataka kutofanya maamuzi kwa utashi wa Mtu, hali itakayopelekea kupindisha haki.

“licha ya hali ya ubinadamu wenu, mjitahidi kadiri Mungu alivyowajaalia mtende haki, mmeteuliwa kwa mujibu wa sheria, fanyeni kwa mujibu wa sheria, kanuni na miongozo tuliyowapa. Msifanye kwa mujibu wa utashi wa Mtu. Rufiji migogoro ya ardhi ni mingi, fanyeni kwa mujibu wa sheria, Mtangulizeni Mwenyezingu mbele” amesisitiza Kunenge.

Amesema uwepo wa baraza hilo litakwenda kupunguza migogoro ya ardhi iliyokithiri Rufiji  huku akiwasisitiza kutenda haki pale wanapofanya maamuzi ya migogoro hiyo.

Vilevile Kunenge, amekemea tabia ya baadhi ya mabaraza ya Kata kufanya maamuzi badala ya kufanya usuluishi ili watu wafikie makubaliano.

“… kazi ya mabaraza ya Kata ni kufanya usuluishi ili kusaidia Watu kufikia makubaliano, na sio kufanya maamuzi” aliongeza Kunenge.

Kwa upande wake, Mkuu wa Wilaya ya Rufiji Meja Edward Gowele amewataka Wajumbe hao kuishi kwenye kiapo walichokiapa ili waende kufuta machozi ya Wanarufiji kwa kutatua kero mbalimbali za migogoro ya ardhi.

“kilio chetu sisi kilikuwa ni kupata baraza hili, naomba mkaishi kwenye kiapo mlichokiapa leo, na sisi tunaamini kupitia ninyi mtaenda kufuta machozi ya Wanarufiji kwenye changamoto walizokuwa nazo” alisema Dc Gowele.

Baraza la ardhi la Wilaya ya Rufiji linakamilisha idadi ya  mabaraza 7 yaliyoundwa Mkoani Pwani ambapo Kwa Wilaya ya Rufiji linabeba historia ya kuwa Baraza la kwanza kuanzishwa na kuwasaidia Wananchi waliokuwa wakikosa haki zao kwasababu ya kushindwa kusafiri kuelekea Wilayani Mkuranga ambapo ndipo walipokuwa wakipata huduma hapo awali.