WAFUGAJI WALIOVAMIA MASHAMBA YA WAKULIMA WAHAMISHWA

Posted on: September 4th, 2020

Mkuu wa Wilaya ya Rufiji Mh. Patrick K Sawala amewafuta machozi wananchi wa Kata ya Ngorongo ambao walikuwa na kilio cha muda mrefu juu ya Wafugaji kulisha Mifugo na kujenga kambi kwenye mashamba ya Wakulima, kutishiwa amani na wafugaji, Viongozi kuweka pesa mbele katika kutoa huduma kwa wananchi, kuuzwa kwa pori linalodaiwa kuwa ni hifadhi ya Msitu wa Kijiji, na kupigwa kwa wananchi wakati wa kudai haki zao.
Akijibu kero za wananchi hao wanyonge Mh. Sawala amaesema " Wanyonge kuonewa kwenye Wilaya yangu Sasa basi!. Hilo haliwezekani." Kufuatia malalamiko hayo Mh. Sawala aliagiza viongozi wasome mpango wa matumizi bora ya aridhi mbele ya Wananchi na kugundua kuwa eneo la kindungulu wanalokaa wafugaji sio eneo lililotengwa kwa ufugaji katika mpango na baadhi ya wafugaji waliopo kwenye eneo lililotengwa hawana vibali na wamezidi idadi inayotakiwa. Kutokana na tatizo ambalo kwa sasa limeleta shida ya njaa kwa wananchi Mh. Sawala ameamuru wafugaji hao kuhama ndani ya siku tatu na kuwatahadharisha viongozi kama walichukua fedha na kuwapangia maeneo wafugaji  kiholela bila kufata taratibu basi kiongozi aliyechukua fedha hizo arudishe kwa Mfugaji na amuondoe . Pia Mkuu wa Wilaya ameagiza TAKUKURU kufanya Uchunguzi juu ya malamiko ya Wananchi kwa viongozi wanaohusishwa na vitendo vya Rushwa.

Aidha ameagiza na kutoa wiki moja kwa Afisa ardhi paamoja na baraza la ardhi kutembelea eneo la msitu wa hifadhi linalodaiwa kuwa limeuzwa ili kujiridhisha na kumpelekea taarifa ya kina juu ya ukweli wa eneo hilo.

Akifunga mkutano huo Mkuu wa Wilaya amewataka wananchi hao kuwa watuivu, na amewataka wafugaji kuvumilia kwa muda kwenda kwenye maeneo wanayotakiwa kuwa mpaka pale mpango wa matumizi bora ya aridhi utakapofanywa upya. Kufuatia maelekezo hayo amewasisitiza viongozi wa kijiji kuhamasisha wananchi hasa wafugaji kushiriki kikamilifu katika mchakato wa mpango huo ili nao wapatiwe maeneo yatakayowawezesha kufuga vizuri. Pia ametoa Uinzi kwa  (Mfugaji) aliyetoa taarifa juu ya viongozi kuwaomba fedha wafugaji wakati wananapotatua migogoro ya wafugaji na wakulima swala ambalo limekuwa halimalizi migogoro badala yake limekuwa likizidisha migogoro.