VIJIJI 33 KATI YA 38 VYAFIKIWA NA MAJI RUFIJI

Posted on: July 26th, 2024

Meneja wa Wakala wa Maji na Usafi wa Mazingira Wilaya ya Rufiji (RUWASA) Eng. Alkam Sabuni, amesema hali ya upatikanaji wa huduma ya maji Wilayani Rufiji hadi kufikia juni 2025 utakuwa umefikia asilima 94, huku akibainisha kuwa mpaka sasa Vijiji 33 kati ya Vijiji 38 tayari vimefikiwa na huduma  ya maji kupitia skimu 17 za maji na kufikia asilimia 86 ya utoaji wa huduma Kwa Wananchi katika mwaka wa fedha 2023/2024.

Eng. Sabuni aliyabainisha hayo kwenye Mkutano wa mwaka wa Wadau wa Sekta ya Maji Wilayani Rufiji, kilichofanyika Ijumaa Julai 26, 2024 katika ukumbi wa Chuo cha Maendeleo ya Wananchi FDC-Ikwiriri, chenye lengo la kujadili hali ya huduma ya maji na uendeshaji wa miradi ya maji Vijijini.

Alisema katika bajeti ya mwaka wa fedha 2023/2024 Serikali ilitenga shilingi bilioni 2.3 kwa ajili ya kuendelea kuimarisha upatikanaji wa maji Wilayani Rufiji hadi kufikia Juni 2024 asilimia 86 ya Wakazi wa Rufiji wanapata huduma ya maji safi na salama.

"hadi kufikia Juni 2024 asilimia 86 ya Wakazi wa Rufiji wanapata huduma ya maji safi na salama, ambapo jumla ya Vijiji 33 kati ya Vijiji 38 vinapata huduma ya maji kupitia Skimu 17 za maji, na Vijiji 5 havina skimu ya Maji, hivyo kupata huduma kutoka katika visima vya Watu binafsi na Taasisi" alisema Sabuni wakati akisoma taarifa ya huduma ya maji Wilaya ya Rufiji katika Mkutano huo.

Aliongeza kuwa kwa mwaka wa fedha wa  2024/2025 RUWASA Wilaya ya Rufiji imetengewa shilingi bilioni 2.178 kwa ajili ya utekelezaji wa miradi ya maji inayoendelea na iliyokwama kwa muda mrefu, ukiwemo ujenzi na ukarabati wa mradi wa maji Nyamwage na Kijiji cha Mloka.

Akizungumza kwa niaba ya Mkuu wa Wilaya ya Rufiji, Afisa Tarafa ya Mkongo Vedastus Luseko, alisisitiza viongozi pamoja na Wananchi kuwa mabalozi wazuri wa kitunza na kuilinda miradi ya maji inayotekelezwa na serikali ambayo imetoa fedha nyingi kwa ajili ya kuwahudumia Wananchi.

"tuendelee kuwa mabalozi wa kuhakikisha miradi hii tunaitunza na kuilinda" alisema Luseko.

Kwa upande wake Mwenyekiti wa halmashauri wa Wilaya ya Rufiji Mhe.  Abdul Chobo aliwataka viongozi na Wananchi kuitunza miradi ya maji inayotekelezwa katika maeneo yao.

"Rais wetu analeta fedha nyingi za miradi na miradi inajengwa, kwahiyo Waheshimiwa Madiwani wenyeviti wa Vijiji, Watendaji wa Kata tunalo jukumu la kuhakikisha kwamba tunatunza hii mbiundombinu na inatumika vizuri na matumizi ambayo ni endelevu ili kuhakikisha juhudu za Mhe. Rais na Mbunge ya kutaka Wananchi wapate huduma inafanikiwa" alisema Mhe. Chobo.