UWEKEZAJI MKUBWA WA KILIMO CHA CHIKICHI KUTOA AJIRA 5,000.

Posted on: May 16th, 2025

Madiwani Wilayani Rufiji Mkoani Pwani wameukubali uwekezaji wa Kilimo cha Chikichi wa hekta 20,000 unaotarajiwa kuwekezwa na Kampuni ya 'Food Star Limited' kutoka Dubai, katika Kata ya Mbwara, Chumbi na Mohoro  ili kuongeza Uzalishaji wa mafuta ya kula nchini, ambao unatarajiwaa kutoa ajira 5,000 za Moja kwa Moja na zisizo za Moja kwa Moja.

Akizungumza kwenye Baraza Maalumu la Madiwani Jana Mei 16, 2025 katika Ukumbi wa Halmashauri lenye lengo la kusikiliza uwekezaji huo,  Mwenyekiti wa Wakurugenzi wa Mamlaka ya Usimamizi wa Wanayamapori Tanzania (TAWA)  na Mwenyekiti wa Kampuni ya Food Star Meja Jen. (Mstaafu) Hamis Semfuko, amesema uwekezaji huo wa Kilimo cha Chikichi kutasaidia kupunguza kwa kiwango kikubwa uagizaji wa Mafuta ya kula kutoka Nchi za nje kuja Tanzania.

Amesema Food Star Imeamua kuja kuwekeza Tanzania kwasababu ya Sera nzuri za Serikali, chini ya Rais Samia Suluhu Hassan Kupitia maonyesho ya Utalii aliyoyafanya Dubai, huku akibainisha kuwa Makao Makuu ya Kampuni hiyo yatakuwa Wilayani Rufiji.

"Kampuni imeletwa kwa Shukrani kubwa ya Rais wetu Samia Suluhu Hassan, kwahiyo katika maonyesho yale ya Dubai waliona Tanzania iko vipi na Wakafurahia Sera za Mhe. Rais wa Jamhuri ya Muungano wa Tanzania na wakaweza kuja" alisema

"Rufiji ndio itakuwa shima kubwa la Kampuni hii. Rufiji tutaipaisha kwa upande wa uwekezaji" aliongeza.

Kwa upande wake Mwenyekiti wa Halmashauri ya Mji Rufiji Mhe. Abdul Chobo, ametoa Shukrani kwa Rais wa Jamhuri ya Muungano wa Tanzania Mhe. Dkt. Samia Suluhu Hassan kwa Sera nzuri za kuvutia Wawekezaji nchini, huku akisema kuwa Rufiji imeanza kunufaika na kazi nzuri ya Rais ya kuimarisha sera ya uwekezaji, huku akimshukuru Mbunge wa Rufiji na Waziri wa Nchi Ofisi ya Rais TAMISEMI Mhe Mohamed Mchengerwa kwa kuwavutia Wawekezaji kuja kuwekeza Rufiji.

"Tunamshukuru Rais wa Jamhuri ya Muungano wa Tanzania Mama Samia Suluhu Hassan Kwa kuimarisha sera ya uwekezaji na leo Rufiji tumeanza kunufaika na kazi ya Rais Samia Suluhu Hassan kwenye Maswala ya uwekezaji" alishukuru Mhe. Chobo.

"Lakini pia nichukue fursa hii kumshukuru Mbunge wetu na Waziri wa TAMISEMI Mhe. Mohamed Mchengerwa alituambia kwamba mwaka huu 2025 mpaka 2030 agenda yetu ya kwanza, kuhakikisha kwanza Rufiji tunaiinua kiuchumi na tunanyanyua maisha ya Wananchi wa Rufiji" aliongeza Mhe.Chobo.

Akiungana na Mwenyekiti wa halmashauri, Diwani wa Kata ya Chemchem Mhe. Ally Manganje alisema uwekezaji huo utasaidia kuongeza kipatoa kwa halmashauri kwa ajili ya KUTOA huduma kwa Wananchi ikiwemo mikopo ya asilimia 10 inayotolewa na Halmashauri.