TUKAFANYE KAZI YA KUHAMASISHA SENSA KWA UZALENDO MKUBWA KAMA ANAOTUONYESHA MH. RAIS

Posted on: June 20th, 2022

Mkuu wa Wilaya ya Rufiji Meja Edward Gowele amewataka Wajumbe wa  Kamati za Sensa ya Watu na Makazi 2022 ngazi ya Kata na Vitongoji kuhakikisha Wanafanya uhamasishaji nyumba kwa nyumba huku wakiweka mbele maslahi ya Taifa na Wananchi wa Maeneo yao ili kuwezesha Serikali  kupata takwimu sahihi ifikapo agosti 23.2022

Meja Gowele ameyasema hayo wakati wa kikao maalumu cha kuwajengea uwezo wa uendeshaji wa zoezi zima la sensa ya watu na makazi  wajumbe wa kamati za Sensa Kata ya Chemchem na Utete pamoja na Vitongoji vyake kilichofanyika katika shule ya sekondari Utete juni 20.2022 ikiwa ni hitimisho la kufanya zoezi hilo kwa kata zote 13 pamoja na vjiji 38 na vitongoji vyake vyote.

" tusikubali mtu aturudishe nyuma kwenye zoezi hili, Rufiji ni yetu wenyewe." alisisitiza Gowele.

Katika hatua hiyohiyo meja Gowele ametumia kikao hicho kukemea vikali baadhi ya Vijana wa Rufiji kujihusisha na vitendo vya kusaidia uingizaji wa mifugo bila kufuata sheria na uharibifu wa mazao unaosababishwa na mifugo na kusema kuwa hatamfumbia macho yeyote atakayehusika bila kujali nafasi aliyonayo

Kwa pande wake Mratibu wa Sensa Faustine Selestine ametoa msisitizo kwa wajumbe hao kuelimisha wananchi kuhakikisha wanakuwa na taarifa sahihi juu ya watu watakaolala kwenye kaya zao usiku wa kuamkia tarehe 23 agosti na kuongeza kuwa hakuna mtu atakayeachwa kuhesabiwa kwani zoezi la sensa ya watu na makazi linatekelezwa kwa mujibu wa sheria ya takwimu sura namba 351.