TUENDELEE KUWAPOKEA NDUGU ZETU, AMBAO MAKAZI YAO YAMEZINGIRWA NA MAJI- DC GOWELE

Posted on: April 6th, 2024

Mkuu wa Wilaya ya Rufiji, Meja Edward Gowele amewata Wananchi kuendelea kuwapokea na kuwapa hifadhi ndugu ambao makazi yao yemezingirwa na maji na wale wanaohama maeneo ya mabondeni ili kupisha maji yaliyofunguliwa katika mradi wa umeme wa Julius Nyerere, hasa katika kipindi hiki ambacho maji yanaendela kufunguliwa.

“niwaombe wale Wananchi ambao mko maeneo salama zaidi, tuwe na moyo wa kuwapokea ndugu zetu (makazi yao yalizingirwa na maji na wanaohama mabondeni), awe ndugu yako asiwe ndugu yako, mpokee na mpe hifadhi kwasababu maisha yenu ni bora zaidi” alisema Gowele.

Gowele aliyazungumza hayo jana aprili 5, 2024 wakati akizungumza na Wahanga wa mafuriko waliohifadhiwa katika Shule ya Msingi Mohoro, Kata ya Mohoro baada ya kukosa makazi, ambapo Kaya 14 zenye jumla ya Watu 67 wamepata hifadhi katika shule hiyo.

Hata hivyo Serikali Wilayani Rufiji inafanya jitihada za kutafuta maeneo mengine ya kuwahifadhi kwakuwa shule zitafunguliwa hivi karibuni.

Gowele alisema kata 12 kati ya 13 zimeathirika na mafuriko na hakuna kifo kilichosababishwa na maji yaliyofunguliwa katika mradi wa Julius Nyerere, huku akiendelea kuwashukuru Viongozi wa Kata, Vijiji, Vitongoji na Chama wanavyokuwa mstari wa mbele kutoa taarifa juu ya maeneo yao kwa serikali.

“tumekuwewa tukitoa taarifa kwa Viongozi wetu, na niwashukuru sana Viongozi hawa, kila siku tunapata taarifa katika kila kona, ili na sisi tuweze kuchukua taratibu za kiserikali na tuweze kuwasaidia ndugu zetu, na tutaendelea kutoa taarifa kupitia Viongozi hawa” alisema DC Gowele.

Hivi karibuni Kamati ya maafa ilifanya kikao na Wajumbe wa kamati za maafa wa kata zote zizilizoathirika, na kutoa maelekezo ya namna ya kufanya tathimini katika maeneo yao, ili kuisaidia serikali kupata takwimu sahihi juu ya athari zilizotokea, ambapo mpaka sasa imeshapita katika Kata zote 12 kati ya Kata 13 za Wilaya ya Rufiji.

Kwa upande wake, Mhandisi kutoka katika mradi wa umeme wa Julius Nyerere Disms Mbote, amesema zoezi la kuyafungulia maji hayo lilianza toka machi 5, 2024 na litaendelea mpaka Mayi 5, 2024.

Naye, Mwenyekiti wa Halmashauri wa Wilaya ya Rufiji ambaye pia ni Diwani wa Kata ya Mohoro, Abdul Chombo ameiomba serikali kuangalia namna ya Wanafunzi kuwaweka karibu na shule ili kuwapunguzia adha ya kuvuka mara kwa mara katika mto Rufiji.

“kama ukipatikana msaada wowote basi Wanafunzi hawa waweze kukaa karibu na shule, hata kama ikishindikana madarasa yote, basi yale ya mitihani” aliomba Mhe, Chobo.