‘tuchangamkieni fursa ya kusoma elimu ya watu Wazima’ Mganga Mkuu Rufiji.

Posted on: November 8th, 2023

Mganga Mkuu wa Halmashauri ya Wilaya ya Rufiji, Hamis Abdallah ameitaka jamii kuchangamkia fursa ya kusoma elimu ya Watu wazima, ngazi ya shule za msingi, Sekondari na Ufundi kwasababu inasaidia kupata fani mbalimbali na kufikia malengo yao, ikiwemo kujiajiri na kuboresha maisha yao.

Ameyazungumza hayo jana Novemba 8, 2023 kwenye Maadhimisho ya Elimu ya Watu Wazima yaliyofanyika Ikwiriri, yenye kauli mbiu ‘Kukuza Uwezo wa Kusoma na Kuandika Kwa Ulimwengu Unaobadilika, Kujenga Misingi ya Jamii Endelevu na Yenye Amani’ ambapo ameitaka jamii kujiunga na elimu hiyo (ambayo haipo kwenye mfumo rasmi) baada ya kukosa nafasi ya kuchaguliwa kuendelea na elimu yenye mfumo rasmi.

“tutoe kipau mbele kwa Vijana wetu, kwenye hizi elimu ambazo hazipo kwenye mfumo rasmi, zitasaidia kufikia ndoto zao, wasibeze hizi elimu zinazotolewa za Watu  Wazima.

Moja ya Faida ya Elimu ya Watu Wazima inaondoa ujinga kwa maana Watu wanajua kusoma na kuandika na kuhesabu, Pia itawasaidia kupata ujuzi na kujitengenezea ajira, kwa mfano nimeona hapa maonesho ya Chuo cha Maendeleo ya Jamii FDC kuna ujuzi wa kushona nguo. pia inamsaidia Mtu kujitoa kwenye hali duni ya maisha kwani anapata fani mbalimbali” amesema Abdallah ambaye ndiye alikuwa Mgeni rasmi katika maadhimisho hayo.

Katika hatua nyingine, akielezea moja ya Programu ya elimu ya Watu Wazima inayotekelezwa Wilayani Rufiji, Afisa Elimu ya Watu Wazima Sekondari, Leonard Selegenyi amesema Halmashauri inatekeleza program mbalimbali ikiwemo Mpango wa Elimu kwa Walioikosa (MEMKWA).

“mpango huu unahusisha Wanafunzi kuanzia miaka 9 hadi 18 wanaosoma elimu ya awali na msingi kwa miaka miwili, alafu wanafanya mtihani wa darasa la nne na baadae wanaendelea na darasa la tano, la sita na wanafanya mtihani wa darasa la saba, na kuendelea na masomo ya kidato cha kwanza” ameelezea selegenyi na kavitaja Vituo vinavyotoa Elimu hiyo.