TAASISI ZA KIFEDHA IGENI MFANO WA NMB: DC GOWELE

Posted on: September 22nd, 2021

MKUU wa Wilaya ya Rufiji Meja Edward Gowele amesema Taasisi za kifedha zinatakiwa kuiga mfano wa benki ya NMB ambayo inatumia asilimia ya faida zake kusaidia mambo ya kijamii.

Meja Gowele amesema endapo Taasisi hizo zitaiga utaratibu huo zitasaidia kupunguza kero kwenye jamii na kuisaidia Serikali kuleta maendeleo kwa wananchi.

Mkuu huyo wa Wilaya ameishukuru benki ya NMB kwa msaada wa meza na viti 50 kwa ajili ya shule ya Sekondari Utete.

Mwenyekiti wa Halmashauri ya Rufiji Juma Ligomba ameishukuru benki ya NMB kwa kutoa msaada huo huku akimuelekeza mkuu wa shule na wanafunzi kutunza samani hizo

Kaimu Meneja wa NMB Kanda ya Mashariki  Harold Lambileki amesema msaada huo wenye thamani ya Sh. Milion 4.5 ni sehemu ya faida ambayo wanairudisha kwa jamii
Lambileki amesema wamekuwa wakisaidia misaada mbalimbali katika Mkoa wa Pwani upande wa sekta ya Elimu na afya kusaidiana na Serikali kutatua kero kwa wananchi.

Mkuu wa shule ya Sekondari Utete Bassa Ngela ambayo ina wanafunzi 1,361 wa kidato cha kwanza hadi cha sita ameishukuru benki hiyo kwa msaada ambao umepunguza uhaba uliokuwepo.
Ngela amesema kwasasa wanakabiliwa na uhaba wa viti na meza 139 huku ukihitajika ukarabati wa majengo 15 kwenye shule hiyo iliyoanzishwa zaidi ya miaka 50 iliyopita.