SIRI YA RUFIJI KUMSHUKURU RAIS SAMIA NA MBUNGE MCHENGERWA

Posted on: May 9th, 2025

Madiwani Wilayani Rufiji wamemshukuru Rais wa Jamhuri ya Muungano wa Tanzania Mhe. Dkt. Samia Suluhu Hassan na Mbunge wa Rufiji ambaye pia ni Waziri wa TAMISEMI Mhe. Mohamed Mchengerwa kwa kuibadilisha Rufiji kwa ujenzi wa miradi mbalimbali ya Maendeleo ikiwemo ukarabati wa Hospitali ya Wilaya Utete, ujenzi wa Madaraja, Shule za Msingi na Sekondari pamoja na Vituo vya Afya, huku akibainisha kuwa katika Kipindi Cha miaka minne Rais huyo ametoa zaidi ya Bilioni 150.

"... tuna Kila sababu ya kuwashukuru Watu hawa (Rais Samia na Mbunge Mchengerwa) kwasababu, katika Kipindi Cha miaka minne Rais Samia ametuletea zaidi ya Bilioni 150 kwa ajili ya ujenzi wa miradi mbalimbali ya Maendeleo, Watu hawa wametutoa kwenye giza na kutuleta kwenye mwanga" alisema Mwenyekiti wa halmashauri ya Mji Rufiji Mhe. Abdul Chobo.

Mhe. Chobo aliyazungumza hayo kwenye kikao Cha Baraza la Madiwani Cha robo ya tatu ya Mwezi Januari- Machi ya mwaka wa fedha 2024/2025 kilichofanyika katika Ukumbi wa Halmashauri leo Mei 9, 2025.

Akitoa salamu za Serikali, Mkuu wa Wilaya ya Rufiji Mhe. Luteni Kanali Fredrick Komba, amesema Wilaya ya Rufiji ipo salama na Kamati ya Usalama Wilayani humo itaendelea kufanya kazi usiku na mchana kuhakikisha Wananchi wanakuwa salama na kuendelea na majukumu yao ya kila siku.

"Kwa ujumla hali ya kiusalama ipo vizuri, Iko shwari kwasababu ya ushirikiano ambao tunapata kutoka kwa Waheshimiwa Madiwani, Chama pamoja na Wananchi kwa ujumla. Na haki ipo shwari kwasababu ya kazi kubwa inayofanywa na Kamati ya Usalama ya Wilaya" alisema DC Komba.

"niwapongeze sana Madiwani kwa kushirikiana na Serikali ya Wilaya, niwapongeze Viongozi wa Chama Wilaya wamekuwa Karibu na Serikali na tunashirikiana sana, niwapongeze Watumishi pamoja na Wananchi. Lakini nikuhakikishie Mhe. Mwenyekiti kuwa Wilaya ya Rufiji ipo salama" alisema Mhe. Komba.