SERIKALI KUHAKIKI KAYA ZA WALENGWA WA TASAF ZENYE WATU WENYE ULEMAVU

Posted on: March 1st, 2022

Kaimu Mkurugenzi Mtendaji wa Halmashauri ya Wilaya ya Rufiji Sebastian Gaganija amewataka wawezeshaji ngazi ya mamlaka ya eneo la utekelezaji kuhakikisha wanafanya uhakiki wa kaya za walengwa wa TASAF ambazo zina watu wenye ulemavu katika vijiji 52 ambavyo vimepitiwa na mpango Wilayani humo na kusisitiza uwepo wa ufanisi na weledi katika utekelezaji wa jukumu hilo ili kufikia malengo yaliyokusudiwa na Serikali.
Gaganija ameyasema hayo leo februari 28.2022 wakati akifungua mafunzo ya siku mbili ya Uhakiki wa kaya za walengwa wa TASAF zenye watu wenye ulemavu kwa wawezeshaji ngazi ya mamlaka ya eneo la utekelezaji.
“ uhakiki huu ni muhimu sana, hivyo mnatakiwa kuhakikisha mnafuata maelekezo na kuzingatia vigezo ili zoezi hili lifanyike katika viwangi vilivyokusudiwa” alisema gaganija
Awali akisoma taarifa fupi ya zoezi hilo Mratibu wa TASAF, Pamella Birukila ameeleza kuwa Mfuko wa Maendeleo ya Jamii (TASAF) unaendelea na utekelezaji wa kipindi cha pili cha awamu ya tatu ambapo kupitia mpago huo Serikali imeamua kutoa ruzuku maalumu kwa kaya zinazonufaika zenye watu wenye ulemavu.
“ Lengo la ruzuku hii ni kuongeza uwezo wa kaya katika kuwahudumia wanakaya wenye ulemavu.” Alisema.
Zoezi la uhakiki linatarajiwa  kuanza kesho tarehe 2 na kukamilika tarehe 8 Machi 2022.