SAWALA ATETEA HAKI ZA WANYAKAZI WA KHARAF WALIOTELEKEZWA RUFIJI

Posted on: January 8th, 2021

Mkuu wa Wilaya Rufiji Luteni Kanali Patrick Sawala amemtaka meneja rasilimali watu wa Kampuni ya M.A KHARAF & SONS Bw. Benjamin kuhakikisha Wafanyakazi wa kampuni yao waliopo Rufiji ambao hawajalipwa mishahara yao tangu mwezi desemba mwaka jana kulipwa mishahara yao na kuacha kuwafanyisha kazi kwa vitisho vya kuwafukuza kazi. Pia amemtaka meneja huyo kuhakikisha anawasainisha mikataba ya kazi kama ilivyo katika mkataba wao wa ajira kutokana na kuendelea kuwafanyisha kazi bila mkataba wakati mkataba wa awali umeshaisha muda wake. “ Tutambue nafasi na mahangaiko ya watanzania wanyonge. Lipeni mishahara yao na madai yao yote. Mikataba iwe tayari ifikapo tarehe 16 januari 2021. Nipate nakala za taarifa zote za hatua zinazochukuliwa kulipa mishahara ya Wananchi wangu.” Alisema.Aidha amemtaka OCD pamoja na Afisa TAKUKURU kumshikilia Bw. Benjamin kwa mahojiano juu ya tuhuma za kutokuonekana kwa makato ya NSSF na Kodi ya malipo kulingana unachokipata malipo ambayo yanaonekana yanakatwa lakini fedha hazipelekwi sehemu husika.Sambamba na hilo, amemtaka Bw. Benjamin kurudi Rufiji tarehe 16 mwezi wa kwanza akiwa pamoja na Mratibu wa Miradi wa Kampuni hiyo ili kujua kwa kina tatizo la kutolipa mishahara wanachi hao.Kwa upaende wao Wafanyakazi wa KHARAF wamemshukuru Mkuu huyo wa Wilaya kwa kuyachukulia hatua za haraka malalamiko yao kwani walimuendea ofisini kwake tarehe mbili mwezi wa kwanza na tarehe nane ameweza kuwakutanisha na viongozi wa kampuni hiyo ambao hawakuwahi kuonana nao kwa kipindi chote cha kazi.Aidha Wanachi na Wafanyakazi hao wameiomba Serikali kusikiliza kilio chao na kuwasaidia ili waweze kujikimu wao na familia zao.Pia Wameomba ufanyike uchunguzi wa kina juu ya ukweli wa makato yao kupelekwa NSSF kwani wao wamekuwa wakizuiliwa kila wanapokuwa na hitaji la kumpelekea malalamiko yao meneja wa NSSF.