Rufiji Yazindua Programu ya Malezi, Makuzi ya Mtoto

Posted on: December 15th, 2023

Halmashauri ya Wilaya ya Rufiji imezindua programu  Jumuishi ya Taifa ya malezi na makuzi ya awali ya Mtoto yenye lengo la kutoa elimu juu ya namana ya kumlinda mtoto kuanzia mwaka 0-8 kwa ajili ya Taifa la kesho.

Uzinduzi wa program hiyo umefanyika katika ukumbi wa Halmashauri ya Wilaya ya Rufiji leo Disemba 15, 2023.

Wakichangia hoja juu ya namna bora ya kumlinda mtoto kwa mujibu wa programu hiyo baadhi ya wajumbe waliohudhuria akiwemo Ramadhani Kagea Mkazi wa Kata ya Kipugira, amedai baadhi ya Wazazi wamekuwa na tabia ya kuishi shamba huku Watoto wakiiwaacha nyumbani  peke yao Kwa lengo la kukaa karibu na Shule.

“kwa upande wangu mimi nizungumzie suala la malezi, kule ninapoishi jamii ya Watu wa kule unakuta kuna nyumba ziko Vijijini lakini kuna nyumba zipo ng’ambo ya mto ambapo ndio wanafanya shughuli za maisha za kila siku, sasa kwa kuwa Kijijini kuna nyumba na kuna Kaka yao labda wa darasa la nne au la tano ndo anabaki na wale Watoto pale Kijijini Baba, Mama wote wanakaa Shamba kwahiyo hapa maana yake Wanapata malezi ya Watoto Watupu, hamna uangalizi wale Watoto wanajilea wenyewe” amesema Kagea.

Akiunga mkono hoja hiyo na kueleza nini kifanyike Mtendaji wa dawati la Jinsia na Watoto Jeshi la Polisi Wilaya ya Rufiji INSP. Amine Iseke amesema kuna haja ya kutoa elimu na kuwataka Watoto na Walezi kutoa taarifa pindi watakapofanyiwa Vitendo vya ukatili.

“hivi vitendo vipo na ndo maana Jeshi la polisi kuna kitengo cha  Dawati la Jinsia na Watoto pia Wakaguzi Kata ambao wapo kila kata, ambao pia wanatoa hii huduma ya ulinzi na usalama na huwa Wanatoa elimu” amesema INSP Iseke.

Pia akitoa Mchango kuhusu namana bora ya kukomesha masuala ya ukatili dhidi ya Watoto Afisa Habari wa Wilaya ya Rufiji Emmanuel Kapandila ameitaka jamii kutofumbia macho na kutoa taarifa pindi wanapoona Mtoto anafanyiwa ukatili, kufanya Ufuatiliaji wa tatizo hadi mwisho ili kuhakikisha haki na wajibu vinapatikana kwa wakati .

“sisi kwenye jamii tunaweza pia tukaelimishana juu ya dhana ya kumuona mtoto wa fulani kama wa kwako, dhana hii inatakiwa kuelimishwa na kubaki katika vichwa vya jamii” amesema Kapandila.

Kwa upande wake Afisa Ustawi wa Jamii Wilaya ya Kibaha Yahya Mbogulume amewataka jamii Kushirikiana kwa pamoja ili kulinda usalama wa Mtoto.

“wote tuliokuwa hapa kwa Pamoja tuweze Kushirikiana tuweze kumsaidia Mtoto wa leo wa Rufiji, Watoto ndio Taifa la Kesho” amesisitiza Mbolugume.

Akizungumza kwa niaba ya Mkuu wa Wilaya ya Rufiji baada ya kuzindua program hiyo , Kaimu Katibu TawalaRichard Mwalingo ameagiza kukamatwa kwa waharifu wote watakaobainika kufanya vitendo vya Ukatili na taarifa za juu ya programu hiyo zitolewe kila mwezi kupitia ofisi ya Mkurugenzi.