RUFIJI TUNA KILA SABABU YA KUMSHUKURU RAIS SAMIA NA MBUNGUE MCHENGERWA -MHE. CHOBO

Posted on: October 30th, 2024

Baraza la Madiwani Wilayani Rufiji limetoa shukrani kwa Rais Samia Suluhu Hassan na Mbunge wa Jimbo la Rufiji ambaye pia ni Waziri wa TAMISEMI Mhe. Mohammed Mchengerwa, kwa namna ambavyo Serikali ya awamu ya sita inavyoibadilisha Wilaya ya Rufiji Katika ujenzi wa miradi mbalimbali ya maendeleo ikiwemo ujenzi wa barabara ya Utete-Nyamwage kwa kiwango cha lami, ukarabati wa majengo ya hospitali ya Wilaya, ujenzi wa Vituo vya Afya na Zahanati, pamoja na ujenzi wa madaraja katika maeneo korofi hasa wakati wa masika.

"sisi Baraza la Madiwani tunapaswa kuwashukuru sana Watu hawa (Rais Samia na Mbunge Mchengerwa), Rufiji ilikuwa gizani, Rufiji ilikuwa haifikiki kutokana na  Miundombinu ya barabara, lakini Rais Samia Suluhu Hassan na Mbunge wetu Mohamed Mchengerwa wametutoa katika shimo na kutuleta Katika mwanga wa Dunia" sehemu ya maneno ya Mwenyekiti wa Halmashauri ya Wilaya ya Rufiji, Mhe. Abdul Chobo huku akigongewa Meza na Baraza la Madiwani.

Mhe. Chobo aliyazungumza hayo katika kikao cha Baraza la Madiwani  cha robo ya kwanza ya mwaka wa fedha 2024/2025 cha mwezi Julai-Septemba, kilichofanyika katika Ukumbi wa halmashauri ya Wilaya ya Rufiji leo Oktoba 30, 2024.

"Rais Samia anatuletea mabilioni ya fedha katika kuboresha barabara zetu, anatuletea mabilioni ya fedha kwa ajili ya maji safi na salama ili tunusurike na kipindupindu. Rufiji tulikuwa tunashuhudia Watu wakipoteza maisha kwa kukosa huduma za Afya, lakini leo Vituo vya Afya vipo karibu yetu. Haya yote ni mapenzi ya Viongozi wetu hawa"

"Maendeleo tuliyoyapata kwa miaka mitatu ya Rais Samia ni makubwa, leo tunaona Barabara ya Utete-Nyamwage inavyojengwa, leo unaona ukarabati wa hospitali ya Wilaya na huduma bora zinazotolewa pale. Sisi kama Baraza la Madiwani tunamshukuru sana Dkt. Samia Suluhu Hassan Rais wa Jamhuri ya Muungano wa Tanzania na Mbunge wa Jimbo la Rufiji Mhe Mohamed Mchengerwa " alisema Mhe. Chobo.

Mbali na hayo Mhe. Chobo alimshukuru Rais Samia kwa kuridhia Rufiji kuwa Halmashauri ya Mji.