RUFIJI: NYUMBA ZAIDI YA 19 ZATEKETEA KWA MOTO

Posted on: August 29th, 2021

Makazi zaidi ya 19 ya Wananchi wa eneo la  Shauri Moyo Kijiji Cha Nyamwage Kata ya Mbwara Wilayani Rufiji yameteketea kwa Moto leo tarehe 29 Agosti, huku chanzo Cha Moto huo kikitajwa kuwa ni baada ya Mwananchi mmoja wa eneo hilo kusafisha eneo lake na Kushindwa kuudhibiti Moto huo.

Akizungumza baada ya kwenda kuona athari za Moto huo, Mkuu wa Mkoa wa Pwani Mhe.Abakar Kunenge ametoa pole kwa Serikali ya Wilaya pamoja na wakazi wa eneo hilo na kuagiza kufanyika kwa tathmini ya Mali zilizoharibika ili Wananchi hao waweze kupatiwa msaada.

Aidha amewapongeza baadhi ya Wananchi waliojitoa kuwahifadhi wakazi ambao wamepatwa na majanga hayo.

Kwa upande wake Mkuu wa Wilaya ya Rufiji Meja Edward Gowelle ameleza hatua ambazo Wilaya imechukua kusaidia Wananchi hao. Pia ametoa salamu za pole kwa Wananchi walioathiriwa na Moto huo huku akitoa rai kwa Wananchi kuacha kusafisha maeneo kwa kuchoma moto hususani katika kipindi chenye upepo mwingi.

Wakielezea tukio hilo, Wananchi na Wakazi wa eneo hilo wameiomba Serikali kuwasaidia kwa haraka ili waweze kupata makazi ya kuishi.
Hadi Sasa hakuna majeruhi yeyote aliyeripotiwa kufuatia ajali hiyo.