RC KUNENGE AWATAKA MADIWANI KUTOA TAARIFA ZA MAENDELEO YA MIRADI KWA WANANCHI

Posted on: April 23rd, 2022

Mkuu wa Mkoa wa Pwani Mhe. Abubakar Kunenge amewataka Madiwani Wilayani Rufiji kutoa taarifa za Maendeleo ya miradi na mipango ya Halmashauri kwa Wananchi badala ya kuacha wananchi kusubiri kutoa malalamiko katika mikutano ya viongozi.

Kunenge ameyasema hayo Aprili 23. 2022 alipofanya Mkutano na Wananchi wa Kata ya Utete na chemchem wakati wa ziara yake ya ukaguzi wa miradi ya maendeleo.

Aidha ametoa pongezi kwa Mkurugenzi wa Halmashauri ya Wilaya ya Rufiji  kutekeleza miradi mingi ikiwa ni pamoja na uchukuaji wa hatua mbalimbali kutatua changamoto za Wananchi chini ya kipindi cha mwaka mmoja.

“ Sisi ni viongozi tunafanya kazi kwa takwimu. Hata mwaka hajamaliza lakini amefanya jitihada kubwa. Niwaombe wenzetu ambao ni wawakilishi wa wananchi, mnapofanya maamuzi au mambo yanayotakiwa muende mkawaeleze wananchi wajue. Wasisikie kwenye mikutano hii.” Alisema

Awali katika Mkutano huo baadhi ya Wananchi walihoji juu ya hatua zilizochukuliwa kufuatia tukio la aliyekuwa Daktari wa Zamu kukataa kumhudumia mama mjamzito aliyekuwa katika wakati wa kujifungua kwa kujibu kuwa amechoka licha ya jitihada za wauguzi  kumsihi atoe huduma, pia bi. Ishata Rwambo alilalamikia swala la kutolipwa fedha zake za mizigo baada ya kustaafu pamoja na wengine waliotoa malalamiko juu ya kusuasua kwa miradi hasa mradi wa jingo la miyonzi pamoja na mtambo wake.

Akijibu baadhi ya hoja zilizotolewa katika Mkutano huo, Mkurugenzi Mtendaji wa Halmashauri ya Wilaya ya Rufiji John Lipesi Kayombo amesema Halmashauri ya Wilaya ya Rufiji tayari imelipa madeni ya Watumishi kwa kutoa fedha takribani Milioni 335 kwa kutumia mapato ya ndani kati madeni yote ya watumishi ambayo yalikuwa milioni 500.

“ tumelipa takribani watumishi 100 kwa kutumia mapato ya ndani. Hivyo nimuombe mama aje ofisini tutamlipa.” Alisema.

Kwa Upande wa jengo la Miyonzi na Mtambo wake Kayombo alisema Halmashauri imetoa fedha  milioni 140 kwaajili ya ujenzi wa jengo jipya na la kisasa ambalo linatarajiwa kukamilika mwaka huu pamoja na mtambo wake.

Aidha kwa upande wa Daktari aliyefanya kosa la kukataa kumhudumia mgonjwa Kayombo amesema Halmashauri ilichukulia jambo hilo kwa uzito na kuwa tayari imeshachukua hatua na kuiandikia barua bodi ya Madaktari ili waweze kuchukua maamuzi.