PINDA AZINDUA MAONESHO YA NANENANE KANDA YA MASHARIKI MKOANI MOROGORO

Posted on: August 2nd, 2025

Waziri Mkuu Mstaafu  wa Jamhuri ya Muungano wa Tanzania Mhe. Mizengo Pinda amezindua rasmi maonesho ya nanenane kanda ya mashariki yaliyofanyika katika viwanja vya Mwalmu Julius Nyerere Mkoani Morogoro leo Agosti 2, 2025.

Maonesho ya nanenane kwa kanda ya mashariki yanajumuisha mikoa minne, Morogoro, Pwani, Tanga pamoja na Dar-es Salaam.

Pinda, amesisitiza taasisi za udhibiti kama TBS na TFDA kushiriki kikamilifu kusaidia bidhaa za wajasiriamali, huku vyuo kama SUA vikitakiwa kutoa elimu ya kitaalamu kwa wananchi.

Vile vile, Pinda alihitimisha kwa kuhamasisha wananchi kushiriki uchaguzi kwa kuchagua viongozi bora kwa maendeleo ya sekta ya kilimo, mifugo na uvuvi, akisisitiza kauli mbiu ya mwaka huu.

Akizungumza kwa niaba ya wakuu wa mikoa ya Kanda ya Mashariki, Mkuu wa Mkoa wa Pwani, Mhe. Abubakar Kunenge, amesema maonesho hayo yanaonesha mafanikio ya Serikali kwa vitendo kupitia matumizi ya teknolojia.

Kaulimbiu ya maonesho ya nanenane mwaka 2025 inasema "Chagua Viongozi Bora kwa Maendeleo Endelevu ya Kilimo, Mifugo na Uvuvi."