NATOA WIKI MBILI MAENEO YOTE YALIYOTENGWA KWA AJILI YA WAFUGAJI YAENDE YAKATEMBELEWE NA KAMATI ZIJIRIDHISHE: Lt. Col. Patrick Sawala

Posted on: March 30th, 2021

Mkuu Wa Wilaya Rufiji ametoa wiki mbili kwa  Watendaji Kata kuhakikisha Wanashirikiana na Kamati za Wakulima na Wafugaji kutembelea maeneo yote yaliyotengwa kwa ajili ya Wafugaji ili kamati hizo zenye Wakulima na Wafugaji zijiridhishe na maeneo hayo.

Ameyasema hayo jana tarehe 30/03/2021 katika kikao kazi kilichohudhuriwa na Katibu Tawala Wilaya, , Mwenyekiti wa Halmashauri, Kaimu Mkurugenzi , Kamati ya Ulinzi na Usalama, Viongozi wa Wafugaji Wilaya na Kata, Wakulima na Wafugaji, Wataalam ngazi za halmashauri na Kata pamoja na Madiwani wa Kata zote,katika ukumbi wa FDC ikwiriri Wilayani Rufiji.

“Nilishatoa maelekezo kwa Watendaji kuhakikisha Vijiji vyote vinatenga maeneo na kubainisha njia za mifugo ili Wananchi wote wazijue kuepuka migogoro . sasa naongeza Wiki mbili nataka Watendaji wote mtembelee hayo maeneo pamoja na kamati zitakazoundwa na kuhakikisha wanajiridhisha kuwa  kuna malisho, na njia za kupita mifugo kuelekea kwenye maji.” Alisema

Aidha ametoa rai kwa Viongozi kuhakikisha kamati hizo zinakuwa na Wafugaji ili kuepuka malalamiko ya kutengewa maeneo yasiyofaa kwa mifugo yao.

 Pia ameagiza Mkurugenzi Mtendaji kuweka alama za vivuko kwa mifugo katika barabara , njia za mifugo toka sehemu moja kwenda sehemu nyingine, kuhakikisha ngazi zote zinazopaswa kusimamia sheria zinapatiwa elimu juu ya sheria hizo.

Sambamba na hilo amepiga marufuku swala la ushushwaji wa Mifugo katika eneo lolote la Wilaya ya Rufiji, Wafugaji kuhakikisha Wanapeleka Shule Watoto wanaostahili kwenda shule, na kuunda kamati ya Wilaya ya Mifugo na Wakulima.

Kwa Upande wake Katibu Tawala Wilaya Bi. Maria Katemana ameelekeza kuhuishwa kwa kamati za vijiji za wakulima na wafugaji ili kushughulikia kwa haraka changamoto zinazojitokeza katika maeneo ya Vijiji kwa wakati. Pia amewataka Viongozi kushirikisha ngazi nyingine pindi wanapoona wanakwama katika maswala yanayohitaji ufafanuzi au uelewa. “ pale ambapo kamati zinaona zinahitaji msaada wa ngazi za juu zihakikishe zinatoa taarifa ofisi ya kata na ofisi ya kata itafanya mawasiliano kwa mujibu wa utaratibu ili kutatua. Pale ambapo tunaona tunahitaji msaada wa kisheria basi tufanye hivyohivyo na mwanasheria atatoa huduma.” Alisema.

Naye Mwenyekiti wa Halmashauri  Mhe. Juma Ligomba, amewataka Viongozi kuacha mara moja mambo yote yaliyosababisha kufikia hatua ya kuleta migogoro ya Wakulima na Wafugaji. “  awali kama tulikuwa hatusimamii sheria kwa makusudi twendeni sasa tukasimamie ili kupunguza migogoro isiyo yalazima”. Alisema.