MWENGE WA UHURU WARIDHISHWA NA UKARABATI WA HOSPITALI YA WILAYA RUFIJI UTETE.

Posted on: April 5th, 2025

Mwenge wa Uhuru umeridhishwa na ukarabati wa Majengo ya Hospitali ya Wilaya ya Rufiji Utete, huku Kiongozi wa Mbio za Mwenge Kitaifa Ismail Ussi akitoa pongezi kwa Mkuu wa Wilaya Mhe. Luteni Kanali Fredrick Komba,pamoja na Mkurugenzi wa halmashauri ya Mji Rufiji Bw. Simon Berege, kwa kusimamia vizuri ujenzi wa miradi mbalimbali ya maendeleo na kuwadumia Wananchi.

"tumekagua na tumeona mradi, mradi huu ni wa Viwango, Mhe. Mkuu wa Wilaya, Mkurugenzi niwapongeze kwa kazi nzuri ya kuwahudumia Wananchi wa Rufiji. Mwenge wa Uhuru Umeridhishwa na ukarabati wa mradi huu" alisema Ussi Kiongozi wa Mbio za Mwenge.

Ussi alitoa kauli hiyo leo, Aprili 5, 2025 baada kukagua ukarabati wa hospitali ambapo Serikali ya awamu ya sita ilitoa Milioni 900 kwa ajili ya ukarabati wa majengo hayo chakavu.

Vile vile Mwenge ulizindua Bweni la Wanafunzi wa Shule ya Sekondari Ikwiriri pamoja na Mradi wa Maji katika Kitongoji cha Nyandakatundu Kata ya Chemchem.

Mbali na uzinduzi, uliweka jiwe la Msingi katika mradi wa Barabara ya kutoka Mahakama-kituo Cha Afya Ikwiriri kuelekea kaunda,  kutembelea Mradi wa Vijana wa kufyatua matofali Ikwiriri cha 'Vijana Taifa la Kesho', pamoja na kutembelea Mradi wa utunzaji wa Mazingira na Matumizi ya nishati safi ya Kupikia.

Ussi aliwataka Wananchi wa Rufiji kushiriki uchaguzi Mkuu octoba Mwaka huu pamoja na kuendelea kutunza amani na utulivu.

Kwa upande wake, Mbunge wa Jimbo la Rufiji ambaye pia ni Waziri wa Nchi, Ofisi ya Rais Tawala za Mikoa na Serikali za Mitaa (TAMISEMI), Mohamed Mchengerwa, alisema Rufiji imepiga hatua kubwa katika Kipindi cha hivi karibuni Shule zaidi 10 zimejengwa.

“Katika kipindi cha hivi karibuni, Rufiji imepiga hatua kubwa katika sekta ya miundombinu, ujenzi wa shule na vituo vya afya. Shule zaidi ya 10 zimejengwa, na vituo vya afya vimeongezeka kutoka viwili hadi kufikia tisa,” alisema Mchengerwa.

Mwenge wa Uhuru umepitia jumla ya miradi sita ya maendeleo wilayani Rufiji, yenye thamani ya shilingi bilioni 1.6. Miongoni mwa miradi hiyo ni uzinduzi wa bweni katika Shule ya Sekondari ya Ikwiriri lenye uwezo wa kuchukua wanafunzi 80.

Kauli mbinu ya Mwenge wa Uhuru mwaka huu inasema 'Jitokezekeze Kushiriki Uchaguzi Mkuu wa Mwaka 2025 Kwa amani na Utulivu'.