‘Mwanafunzi anaposhinda na njaa Shuleni, uwezo wake wa kusoma unakuwa sio mzuri’ –Mganga Mkuu

Posted on: February 13th, 2024

Mganga Mkuu wa Halmashauri ya Wilaya ya Rufiji Hamis Abdallah amewataka wajumbe wa vikao vya lishe Wilayani Rufiji kuweka mikakati madhubuti ya kuhakikisha Wanafunzi wanakula Chakula cha pamoja shuleni hali itakayosaidia kuongeza uwezo wa kusoma na kupandisha ufahulu wa Wanafunzi.

Dr. Hamis ameyasema hayo katika kikao cha lishe cha robo ya pili ya mwaka 2023/24 kilichofanyika katika ukumbi wa Halmashauri ya Wilaya ya Rufiji leo Februari 13, 2024 ambapo moja ya mambo yaliyoshauriwa mashuleni kuwe na mashamba ya Chakula kwa yale maeneo yasiyokuwa na wanyama waharibifu, au zao la biashara kwa yale maeneo yaliyokuwa na wanyama waharibifu ambayo yatakapouzwa yatayosaidia wanafunzi kula Chakula kwa pamoja wanapokuwa shuleni na kuongeza ufahulu.

Amesema tafiti nyingi zinaonesha  wazi kwamba kama Mtoto atakuwa anashinda na njaa shuleni uwezo wake wa kusoma unakuwa sio mzuri.

“… nafikiri tunaona matokeo ya kidato cha nne, la saba, matokeo ya form two (kidato cha pili) na form four (kidato cha nne), kwa hiyo sisi kama Wajumbe wa vikao vya lishe tuhakikishe tunaweka mikakati mbalimbali, kwasababu na sisi kwenye huo ufahulu kuna asilimia yetu tunaiweka” amesisitiza Hamis.

Kwa upande wake, Afisa lishe Wilaya ya Rufiji Omary Kombo amesema moja ya changamoto ya suala la lishe mashuleni ni mwitikio hafifu wa Wazazi na Walezi kutoa Chakula cha mchana kwa ajili ya Wananfunzi wanapokuwa shuleni.