Mvua Yaua Mtoto Rufiji, Wazazi Wahimizwa Kuchukua Tahadhari.

Posted on: November 1st, 2023

Katibu Tawala wa Halmashauri ya Wilaya ya Rufiji, Ayubu Sebabile amewataka Wananchi kuwadhibiti Watoto wasicheze kwenye mvua  wakati  ikiendelea kunyesha ili kuwakinga na madhara mbalimbali ikiwemo kupigwa na radi  pamoja na kuchukua tahadhari dhidi ya mvua zinazoendelea kunyesha.

Kauli hiyo imekuja alipokwenda kutoa pole kwenye tukio la kifo cha Mtoto wa miaka 3 ambaye amekutwa amefariki kwenye mtaro wa maji kwa madai ya kusombwa na Maji ya mvua leo Novemba 1, 2023 katika Kitongoji cha Nyangwai Kata ya Chemchem Utete Rufiji.

"lakini kipindi hiki mvua ni nyingi sana, Wananchi waendelee kuchukua tahadhari na kufuatilia vyonbo vya habari ili kujua utabiri wa hali ya hewa" . Alisistiza Sebabili

Wakizungumzia tukio hilo baadhi ya mashuhuda, wamesema wakati mvua ikiendelea kunyesha mtoto huyo alikuwa anafuata kiatu chake kilichokuwa kinaelea kwenye mtaro, ndipo akusombwa na Maji hali iliyosababisha kifo chake.

"Yule Mtoto alikuwa anachezea Maji na wenzake, sasa alikuwa anafuata kiatu kwenye mtaro ndo akasombwa na Maji".

Akizungumza kwa hisia Baba wa Mtoto huyo, Peter Masunga amesema amezipata taarifa hizo akiwa shambani kutoka kwa rafiki yake.

"alikuja akanikuta nakula shambani, akaniambia twende nyumbani haraka kuna mgonjwa kazidiwa, nafika nakuta watu wengi nyumbani kwangu na nikapewa taarifa za msiba wa Mtoto wangu"Amesimulia Masunga.

Mtendaji wa Kata ya Chemchem- Jonathan Chingwile, amewaomba Wazazi kuwachunga watoto wao hasa kipindi hiki cha mvua.

Ikumbukwe juzi Oktoba 30, 2023 mvua imeezua paa katika nyumba tatu za Wakazi wa Kitongoji cha Kiwili Kata ya Utete Rufiji.