'mvua ikinyesha usijifiche chini ya mti' Mwaluseke

Posted on: November 6th, 2023

Kamati ya Maafa ya Halmashauri ya Wilaya ya Rufiji imeendelea kutoa elimu ya tahadhari na hatua za kuchukua dhidi ya mvua zinazoendelea kunyesha ili kuokoa maisha ya Wananchi.

Kutokana na utabiri wa Mamlaka ya Hali ya Hewa nchini Tanzania (TMA), msimu huu kutakuwa na mvua nyingi (El-nino).

Akielezea hatua hizo Novemba 5, 2023, wakati akizungumza na Wananchi wa Kata ya Ngorongo katika Kijiji cha Ngorongo Mkuu wa Jeshi la Zimamoto na Uokoaji Wilaya ya Rufiji Inspekta Henry Mwaluseke, amewasihi Wananchi wasijifiche chini ya mti wakati mvua ikiendelea kuonyesha.

"Vilevile mvua ikinyesha usikae shambani rudi nyumbani, pia tukarabati nyumba zetu, kule Utete (Kitongoji cha Kiwili) nyumba tatu zimeezuliwa bati, Wananchi tusikae mabondeni tutoke huko msimu huu kutakuwa na mvua nyingi, ukiona mvua inanyesha alafu kuna radi zima kiunganishi cha umeme kwenye nyumba yako (main switch). 

Ndugu zangu huu ndio wakati wa kuonyesha umoja na mshikamano, kama tunatofauti naomba tuziache ili tuweze kusaidiana" amesisitiza Mwaluseke.

Kwa upande wake Katibu wa Kamati hiyo Semeni Mbigo amezitaka Halmashauri za Vijiji kuunda timu ya dharura ya Maafa ya watu sita ili iweze kuwasaidia pindi Maafa yatakapotokea, licha ya kuwa na Kamati za Maafa katika Vijiji.

"chagueni vijana 6 wenye uwezo wa kuogelea, katika timu hiyo pia awepo Mgambo1 , skauti1, pamoja na Askari polisi Kata na Watatu waliobaki ni Wananchi kutoka kwenye Jamii zetu" amesema Mbigo.

Akiendelea kusisitiza nini Wananchi Wakifanye kipindi hiki cha mvua, Ferbet Msapila amewasistiza Wananchi kufanya usafi katika maeneo wanayoishi pamoja na kuchimba misingi ya njia za maji pembezoni mwa nyumba wanazoishi ili maji ya mvua yasiwe na uwezo wa kuangusha udongo.

Kamati hiyo mpaka sasa imeshatembelea Kata sita, Muhoro, Chumbi, Mkongo, Ngorongo, Kipugira na Mwaseni.