Msiweke Makazi ya Kudumu Katika Maeneo Yaliyotengwa na Serikali-DC Gowele

Posted on: January 5th, 2024

Mkuu wa Wilaya ya Rufiji Meja Edward Gowele amewataka viongozi wa vitongoji na Vijiji kutoa elimu kwa Wananchi juu ya namna ya kumiliki ardhi kihalali, hali itayosaidia Wananchi kutovamia maeneo yaliyotengwa na Serikali kwa ajili ya maendeleo ya Wananchi na kupunguza migogoro kati ya maeneo ya serikali ambayo huvamiwa na kugeuzwa kuwa makazi ya Wananchi.

Amesema imekuwa ni kawaida kwa baadhi ya Wananchi kuingia katika maeneo ya serikali bila ya kujua.

Meja Gowele ametoa kauli hiyo leo January 4, 2024 wakati akizungumza na baadhi ya Wananchi wa Kitongoji cha Golani Kata ya Chemchem Wilayani Rufiji Mkoani Pwani, katika eneo la uwanja wa ndege ambapo Familia ya Mzee Saidi Matimbwa ilimuomba Mkuu wa Wilaya kwenda kurudisha eneo lao walilokuwa wanalalamika kuwa limechukuliwa ambapo baada ya Ufuatiliaji wa Nyaraka ikiwemo ramani imebainika kuwa eneo linalodaiwa limo ndani ya eneo la kiwanja cha ndege .

“Viongozi wa Vitongoji na Vijiji muwaeleze wananchi wasiweke makazi ya kudumu katika maeneo yaliyotengwa na serikali, na Mtu unapochukua eneo ni vizuri ukajua kama ni la Serikali au sio, niwaombe wanarufiji tusiweke ugumu sana kwenye maendeleo” Amesisitiza DC Gowele.

Akitoa elimu, Mwanasheria wa Halmashauri ya Wilaya ya Rufiji Nuru Pipino amesema mtu yeyote atakayevamia na kufanya makazi katika eneo la serikali hawezi kulipwa fidia na kuwataka wananchi kuhakikisha wanafuata utaratibu pindi wanapotaka kutumia maeneo badala ya kujimilikisha nje ya utaratibu.

“serikali inalipa fidia pale tu inapoingia kwenye eneo la Mtu na huyo Mtu  awe na umiliki halali wa hilo eneo, eneo lolote likiwa linamilikiwa na taasisi ya serikali, na Mtu akaenda kuingia  kwenye lile eneo baada ya serikali kuwa na tayari inaumiliki wa hilo eneo, huyo Mtu atakuwa amevamia” amesema.

Wakikiri kuwa kuwa kiwanja chao kipo ndani ya uwanja wa ndege baada ya ushahidi wa nyaraka za kisheria Wanafamilia hiyo akiwemo Asha Muhando ameiomba serikali iwatazame kwa jicho la huruma pale walipoishi katika eneo hilo na kupanda mikorosho.