MPEKELEKE MTOTO SHULE HATA KAMA HANA UNIFORM- DC GOWELE

Posted on: January 8th, 2024

“serikali imeshasema Mtoto hata kama hana uniform aje hivyohivyo shuleni, si lazima awe na uniform kwa sasa, waje Shuleni hivyohivyo walivyo, waripoti shule alafu utaratibu wa kuwatafutia utaendelea. endapo hawataripoti Wazazi tutawachukulia hatua kali”

Hayo yamesisitizwa leo January 8, 2024 na Mkuu wa Wilaya ya Rufiji Meja Edward Gowele wakati akiwapokea Wanafunzi wa kidato cha kwanza, darasa la kwanza na Wanafunzi wa shule za awali katika Shule tofauti Wilayani Rufiji, walioripiti mara baada ya shule kufunguliwa leo ikiwa ni ziara yake ya kuangalia kama Shule mpya zilizojengwa na serikali zimeanza kupokea Wanafunzi.

Amesema kuwa kama serikali imefanya jitihada kubwa ya kuboresha miundombinu ya Shule ili kuhakikisha Wanafunzi wanapata elimu bora huku akiwataka wazazi kuhakikisha wanapeleka watoto shuleni ndani ya wiki na kuweka bayana kuchukuliwa hatua kali za kisheria kwa wazazi watakaoshindwa kupeleka watoto ndani ya wiki hii.

“Hii wiki nzima nitakuwa napita katika shule kuhakiki idadi ya Watoto lakini pia kuchukua takwimu kutoka kwa Watendaji Kata” amesisitiza Gowele.

Shule alizotembelea ni Shule ya Sekondari Bibi Titi, Shule ya sekondari Chemchem, Shule ya Msingi Rufiji na Shule ya Sekondari Rufiji.

Kwa upande wao Maafisa elimu Sekondari na Msingi Wilaya ya Rufiji wamesema wamefanya jitihada za kuhakikisha wanawahamasisha Wazazi pamoja na Wakuu wa Shule ili Wanafunzi waripoti kwa wingi mashuleni kama ilivyokusudiwa na serikali  kuona kila Mtoto wa Kitanzania anapata haki ya elimu.

Kwa upande wa Wanafunzi walioripoti Shuleni wameipongeza Serikali kwa kujenga na kuboresha  miundombinu ya shule huku wakiahidi kusoma kwa bidii.