Mkuu wa Wilaya ya Rufiji Mh: Juma A. Njwayo atoa tiba ya kukabiliana na Matokeo mabovu darasa la VII Wialayani Rufiji

Posted on: November 2nd, 2017

Mkuu wa Wilaya ya Rufiji Mhe: Juma A. Njwayo asema hali ya matokeo mabovu ya darasa la saba katika Halmashauri ya Wilaya ya Rufiji haivumiliki. Akiongea katika kikao cha Baraza la Madiwani kilichohudhuriwa na waheshimiwa madiwani, wakuu wa Iadara na vitengo, watendaji kata na vijiji na wageni waalikwa mapema Novemba 2, 2017 katika ukumbi wa Halmashauri Wialayani Rufiji  alisema amepokea matokeo ya darasa la VII 2017 kwa masikitiko makubwa kutokana na Halmashauri kufanya vibaya katika matokeo ya mtihani huo. 

Halmashauri ya Wilaya ya Rufiji imeshika nafasi ya 10 kutoka mwisho kati ya Halmashauri 167 zilizofanya mtihani huo mwaka 2017 na imekuwa ya mwisho katika Mkoa wa Pwani. Mhe: Mkuu wa Wilaya amesema hali hiyo ya matokeo mabovu haivumiliki kamwe. Ili kunusuru swala hilo amesema ni lazima kata zifanye mikutano na wadau wote wa elimu kutafuta suluhisho la tatizo hilo. Kikao cha pamoja kitafanyika mapema mwezi Januari 2018 ili kujadili kwa pamoja mapendekezo yaliyotolewa na wadau mbalimbali katika kata zote 13 za halmashauri ya Wialaya ya Rufiji.

Katika kikao hicho pia Mhe: Mkuu wa Wialaya alitoa onyo kwa wakulima wanaouza korosho nje ya maghala (mnada). Msimu wa korosho ulishafunguliwa tangu Oktoba 2017 na kuna taarifa kuwa baadhi ya wakulima wanauza korosho zao nje ya utaratibu uliopangwa na Serikali kuwa korosho iuzwe kwa njia ya mnada. Madiwani wana jukumu la kuwaelimisha wananchi katika kata zao kuhusu umuhimu wa kuuza korosho kwa njia ya mnada.

Kuhusu swala la kufunguliwa tawi la Benki katika Halmashauri ya Wialaya ya Rufiji Mhe: Mkuu wa Wialaya alisema kuwa mchakato bado unaendelea na kuna uwezekano katika mwaka 2018 NMB wakafungua tawi lao la Benki Wialayani Rufiji. Hivyo wananchi na watendaji wa Rufiji wawe na subira wakati swala hilo likifanyiwa kazi.