MILIONI 545,864,852 ZATOLEWA KWA VIKUNDI VYA WANAWAKE, VIJANA NA WENYE ULEMAVU.

Posted on: December 15th, 2021

Halmashauri ya Wilaya ya Rufiji leo tarehe 15 Desemba 2021 imekabidhi jumla ya shilingi Milioni 545, 864,852 kwa Vijana, Wanawake na Wenye Ulemavu. 
Akizungumza wakati wa kukabidhi hundi ya mfano kwa vikundi hivyo Mwenyekiti wa Halmashauri Juma Ligomba amewataka wanufaika hao kuhakikisha wanarejesha mikopo hiyo kwa wakati ili kutimiza lengo la Serikali la kuwainua Wananchi wake kiuchumi.

" Serikali ya awamu ya Sita chini ya Mhe. Samia Suluhu Hassan imedhamiria kuhakikisha inatoa mikopo isiyokuwa na riba kwa Wananchi wake ili waweze kunufaika. Hivyo ni wajibu wenu kurudisha mikopo hiyo kwa wakati." Alisema Ligomba.

Sambamba na hundi hiyo ya mfano Mhe. Ligomba amekabidhi pikipiki 15 kwa vikundi vya bodaboda.

Kwa upande wake Kaimu Mkurugenzi wa Halmasahuri Edward Mwamotela ametoa ushauri kwa Wanufaika wa mikopo ya bila riba kuamua kufanya kazi na kuanzisha miradi mikubwa itakayowawezesha kupewa mikopo mikubwa zaidi badala ya kuendelea kupokea fedha kidogo kutokana na udogo wa miradi wanayobuni.

" Ni wakati Sasa tufikirie kuanzisha miradi mikubwa zaidi ili mpate mikopo mikubwa itakayoleta tija katika uzalisha na kupanda kwa uchumi Wilayani kwetu." Alisema.

Akitoa ushauri kwa Wanufaika wa mikopo hiyo, Afisa Maendeleo ya Jamii Wilaya ya Rufiji George Mbilinyi amesema idara ya Maendeleo ya Jamii Wilayani Rufiji Ina nafasi kubwa Kama wadau wa maendeleo kushiriki katika miradi inayotekelezwa na Serikali huku akisisitiza Wanufaika hao kushiriki kikamilifu katika miradi hiyo.

Khalfan Kulgio moja Kati ya Wanufaika wa mikopo hiyo ameishukuru Serikali kwa kuendelea kutoa fedha nyingi na kuwainua Wananchi wake kiuchumi kwani mikopo hiyo imebadilisha maisha Yao toka kwenye hatua sifuri mpaka Sasa kumiliki Vyombo vya biashara zikiwemo pikipiki.