MH. SAWALA: MBWARA SISI NI WATUMISHI WENU, MTUTUME.

Posted on: September 3rd, 2020

Mkuu wa Wilaya ya Rufiji,M, Mh. Luteni Kanali Patrick K Sawala amewataka wanakijiji  wa kijiji cha Mbwara kutumia viongozi wao kusema mahitaji yao ili watekelezewe kwa wakati badala ya kukaa kimya. “ Sisi viongozi wenu ni watumishi wenu. Mtutume.” Ameyasema hayo  leo alipokuwa kwenye Mkutano na Wanakijiji cha Mbwara kata ya Mbwara ikiwa ni katika kutekeleza ahadi yake ya kuzunguka kata zote na vijiji vyote kushughulikia kero za Wananchi wa Wilaya ya Rufiji. Akizungumza katika utangulizi wa kikao hicho Mh. Sawala alisema “Mimi nimekuja kushirikiana na watu wa Mbwara, peke yangu siwezi. Maendeleo ya Mbwara yanaletwa na Wana Mbwara wenyewe. Semeni mahitaji yenu nami nitayafanyia kazi”.

Baada ya Utangulizi huo Mh. Sawala aliwaruhusu wananchi kuanza kutoa kero zao ambapo Bw. Saidi Kipengele alilalamikia tatizo la ubovu wa miundombinu ya maji hasa kupasuka kwa mabomba na ubovu wa jenereta inayotumika kuzalisha umeme wa kuendesha mitambo ya maji. Bw. Sefu A. Kingwande amezungumzia swala la Elimu hususani upungufu wa Walimu katika Shule ya Msingi Mbwara ambayo inawananfunzi takribani 466 na walimu 04 tu. Pia Bi. Tabia Kibure ameomba msaada wa kuungwa mkono katika uchangiaji wa madawati Shule ya Sekondari Mbwara. Kero nyingine ni pamoja na upungufu wa wahudumu katika zahanati, Wizi wa kuku na pikipiki, kutojulikana kwa mipaka ya kijiji cha Mbwara na Kitapi, pamoja na Mbwara na Tawi.

Akijibu kero hizo Mh. Sawala amesema tatizo la maji lilikuwa ni uzembe wa wasimamizi kwa kushindwa kutoa fedha ya mafuta wakati maji yalikuwa yanalipiwa na wanakijiji, “ Ninatoa maelekezo. leo jioni nipate taarifa kuwa Jenereta linawaka. Haiwezekani jenereta halijawashwa miaka na miaka. Huo ni uharibifu wa mali za Serikali. Nataka tatizo la maji liishe.” Akiongezea katika kujibu kero ya maji Meneja wa Tanesco Ndg. Said M. Masoud amesema wameshaomba Transifoma kwaajili ya kuunganisha umeme kwenye mradi wa maji hivyo ikiletwa muda wowote litafungwa na mitambo itaanza kutumia umeme wa vijijini. Katika suala la Elimu na Madwadi ameahidi kulifanyia kazi mara moja na kuwa madawati ndani ya wiki mbili yatakuwa yamepatikana. Pia katika suala la Wizi Mh. Sawala amewataka wanakijiji kuwa na mpango wa ulinzi shirikishi na kutoa ushirikiano kwa polisi ili kubaini wahalifu na kuwakamata sambamba na hilo, ametoa maelekezo kwa wananchi kuwa kila mwananchi awe mlinzi wa mwenzake na kutoa taarifa kwa viongozi pindi wanapomuona mtu mgeni katika mazingira yao. kwa upande wa upungufu wa wahudumu wa Afya na dawa Mh. Mkuu wa Wilaya kupitia Mganga Mkuu wa Wilaya ameasema tayari maombi ya watumishi 17 yameshafanyika ili kuziba mapengo ya watumishi katika vituo na zahanati na kuwa kwa zahanati iliyokuwa imekosa usajili MSD imeshashughulikiwa na ndani ya wiki mbili usajili utakuwa umekamilika. Vilevile amejibu tatizo la Migogoro ya mipaka ya vijiji kwa kuwataka wanakijiji kuwa watulivu wakati timu ya mipango ya udhibiti wa matumizi bora ya ardhi inaendelea.

Akifunga Mkutano huo Mh. Sawala amewataka wananchi kufanya kampeni za kistaarabu na kuepuka kujihusisha na vitendo vya vurugu.