MCHENGERWA AWAKIMBILIA WAATHIRIKA WA MAFURIKO RUFIJI, ATOA MILIONI 40

Posted on: April 3rd, 2024

Waziri wa TAMISEMI na Mbunge wa Jimbo la Rufiji Mohamedi Mchengerwa, ametoa pole kwa Wananchi wa Rufiji ambao mazao yao yameathirika kwa maji yaliyofunguliwa katika mradi wa kuzalisha umeme wa bwawa la Julius Nyerere, baada ya bwawa hilo kujaa kupita kiwango kilichokusudiwa, hali iliyosababishwa na mvua nyingi zinazoendelea kunyesha.

Mchengerwa ametoa pole hizo jana Aprili 2, 2024 wakati akizingumza kwa nyakati tofauti na Wananchi wa Nyamwage, Chumbi, Mohoro na Utete, ikiwa ni ziara yake ya kuwapa pole Wananchi wa Rufiji.

“poleni sana kwa kupoteza kila kitu” alisema Waziri Mchengerwa.

Mbali na hayo, Waziri Mchengerwa ameahidi kutoa fedha kiasi cha shilingi  milioni arobaini kwa Wananchi walioathirika ili isaidie kununua mbegu zitakazopandwa baada ya kipindi cha kufunguliwa maji hayo kupita.

 “kila mwaka huwa tunakuwa na shughuli ya kufuturisha, lakini kwa mwaka huu kutokana na mafuriko haya, kile kiwango cha mshahara wangu na nimedunduliza kidogokidogo, nikasema leo nije hapa (kutoa pole), fedha niliyotenga kwa ajili ya kufuturisha ilikuwa milioni 40, sasa nitaikabidhi ili kumwezesha kila Mwananchi wa Rufiji apate mbegu” aliongeza Mchengerwa

Akitoa taarifa fupi, Mkuu wa Wilaya ya Rufiji Meja Edward Gowele alisema hakuna kifo kilichotokana na mafuriko hayo, na kuongeza kuwa Kamati ya maafa inaendelea kufanya tathimini ya namna Wananchi walivyoathrikia, ambapo mpaka sasa imeshafanyika katika kata 6.

Waziri Mchengerwa amesema kuwa amefarajika kuwaona Wananchi wa Rufiji namna walivyokuwa pamoja wakishirikiana na viongozi wa Serikali baada ya maafa hayo kutokea na kusisitiza kuendelea kushikamana na Serikali ili kukamilisha ndoto za mafanikio katika Wilaya hiyo.

Katika hatua nyingine, Mchengerwa aliwataka Viongozi wa Serikali Nchini kushikamana pamoja na kusikiliza kero za Wananchi.

Vilevile Mchengerwa aliwataka Wazazi kuwasisitiza Watoto wao wasome kwa bidii ili waje kuisaidie jamii inayowazunguka.