MCHENGERWA AMTAKA MKANDARASI WA DARAJA LA MBAMBE KUONGEZA KASI YA UJENZI

Posted on: March 17th, 2025

Waziri wa Nchi, Ofisi ya Rais-TAMISEMI ambaye pia ni Mbunge wa Rufiji Mhe. Mohamed Mchengerwa, amemtaka mkandarasi Kampuni ya Nyanza Road Works kuongeza kasi ya ujenzi wa Daraja la Mbambe lenye urefu wa meta 81 linalounganisha Barabara ya Ikwiriri - Mloka, ili likamilike kwa wakati na kuondoa adha ambayo wananchi wilayani Rufiji wamekuwa wakikabiliana nayo.

Waziri Mchengerwa ametoa maelekezo hayo kwa mkandarasi huyo, wakati wa ziara yake ya kikazi iliyolenga kuhimiza ukamilishaji wa ujenzi wa daraja hilo la Mbambe linalojengwa katika Kijiji cha Mbambe, Kata ya Mkongo wilayani Rufiji.

“Mkandarasi ongeza kasi ya ujenzi wa daraja hili kwani asilimia 22 iliyofikiwa bado ni ndogo sana, na kwa kasi hii ndogo mnayoenda nayo mvua zikiongezeka zitaleta changamoto itakayokwamisha ujenzi wa daraja hili,” Mhe. Mchengerwa amesisitiza.

“Mkuu wa Wilaya naelekeza Meneja wa TANROADS mkoa kuanzia wiki ijayo aje kuwalipa fidia wale wote waliohakikiwa madai yao, kwani Rais Samia amekwishatoa fedha milioni 500 kwa ajili ya fidia,” Mhe. Mchengerwa ameelekeza.

Mchengerwa aliyazungumza hayo Jana Machi 17, 2025 wakati akiwa njiani kuelekea Kijiji Cha Kilimani kupata futari pamoja na Wananchi.

Kwa upande wake, Msimamizi wa Mradi upande wa Mkandarasi Kampuni ya Nyanza Road Works Mhandisi Emmanurel Owoya amesema kuwa, ujenzi wa daraja umefikia asilimia 22 ampapo tayari nguzo za msingi 64 zimeshajengwa kati ya 107 zinazotakiwa kujengwa, na juu ya hizo

 nguzo litamwagwa zege ikiwa ni pamoja na kujenga makalavati makubwa 3 na dogo moja.

"daraja lina meta 81,lakini pia Kuna madaraja madogo madogo Manne, yapo makubwa matatu yana milango minne ya Mita tano tano (upana Mita 5 na kwenda juu Mita 5). Lakini pia Kuna daraja dogo lenye Karavati Moja, lakini pia tutajenga kilometa 3 za maingilio kwa kiwango cha lami, kiujumla tupo kama katika asilimia 22 hivi za utekelezaji, kwahiyo hiyo ndio kazi ambayo tutaifanya hapa kwenye mradi" alifafanua Eng. Owoya.

Jumla ya Shilingi bilioni 24, 164, 904, 622 zitatumika kujenga daraja la MBAMBE lenye urefu wa meta 81 ikijumuisha ujenzi wa barabara za maingilio kilomita 3 pande zote mbili za daraja kwa kiwango Cha lami.