MCHAKATO WA UTOAJI ARIDHI KUCHUNGUZWA UPYA

Posted on: August 14th, 2022

Mkuu wa Wilaya ya Rufiji Meja Edward Gowele ameitaka Taasisi ya Kuzuia na Kupambana na Rushwa (TAKUKURU) Kufanya uchunguzi wa Mihtasari ya Kijiji iliyoandikwa wakati wa vikao vya Mkutano Mkuu vilivyofanyika kuridhia utoaji wa aridhi kwa Mwekezaji.

Meja Gowele ameyasema hayo katika Mkutano na Wananchi wa Kijiji Cha Kilimani Mashariki uliofanyika Katika viwanja vya ofisi ya Kijiji Kata ya Ngorongo Wilayani Rufiji baada ya kupokea malalamiko toka kwa Wananchi, ambao walilalamika juu ya eneo lao kuuzwa na Benki kutokana na Mwekezaji wa kampuni ya RAT aliyekopa  Benki kwa kutumia hati zilizoonesha kuwa ni za eneo la Kijiji hicho kushindwa kulipa deni.

" Hili lazima ntalibeba sitawaacha peke yenu. Ila nimewaambia Mwekezaji alipataje hati kupitia makubaliano yenu wenyewe. Niwatake TAKUKURU kuchunguza nyaraka zote za Mihtasari iliyokaliwa na wote waliohusika watajulikana." Alisema Gowele.

Awali Mkurugenzi Mtendaji wa Halmashauri ya Wilaya ya Rufiji John Kayombo aliwata Wananchi hao kuachia uongozi wa Wilaya kufanyia kazi malalamiko hayo na kupunguza malalamiko kipindi ambacho swala Hilo lipo kwenye uchunguzi.

Kwa upande wake Diwani wa Kata ya Ngorongo Hassan Ally Mpange amekili kuziona nyaraka zote zilizopitishwa Katika Kijiji hicho ambazo zimetoa uhalali kwa Mwekezaji wa kampuni ya RAT kupata hati ya eneo hilo mbali na kuwa Wananchi hawakukubali Mwekezaji huyo kupata eneo.

" Ndugu zangu huu ni wakati wa kujitafakari, Tuwe makini sana tunapochagua vijana kutuwakilisha kwenye nafasi za uongozi wa Vijiji na Kata." Alisema mpange

Meja Gowele amewataka Wananchi wa Kata ya Ngorongo na Rufiji Kwa ujumla kuhakikisha Wanashiriki sensa ya Watu na Makazi ili kuiwezesha Serikali kujua idadi ya Watu wake na kupanga mipango bora kwa Maendeleo