MCHAKATO WA UKUSANYAJI KODI ZA MAJENGO KUANZA RASMI RUFIJI.

Posted on: February 8th, 2021

Mkurugenzi Mtendaji wa Halmashauri ya Wilaya Rufiji Ndugu Rashid Salum Salum amewataka watendaji wa Vijiji, Kata na Maafisa Tarafa kuanza rasmi zoezi la Utambuzi wa Nyumba zinazotakiwa kulipiwa kodi pamoja na taarifa sahihi za Wamiliki au Wasimamizi wa Nyumba zote katika Halmashauri zenye sifa ya kulipiwa kodi ya Majengo.

Ameyasema hayo katika kikao maalum kilichojumuisha Maafisa Tarafa, Watendaji wa Kata, Wenyeviti wa Vijiji, Watendaji wa Vijiji pamoja na baadhi ya Maafisa wa Halmashauri Kufuatia maelekezo  ya Serikali yaliyotolewa na Mhe. Suleiman Jafo Waziri wa Nchi Ofisi ya Rais TAMISEMI  katika kikao maalumu cha Makatibu Tawala wa Mikoa, Wakuu wa Wilaya pamoja na Wakurugenzi watendaji wa Manispaa na Halmashauri zote Nchini kilichofanyika tarehe 5/2/2021 Mjini Dodoma.

 “ Maelekezo ya Serikali yametutaka Wakurugenzi kusimamia ukusanyaji wa kodi za majengo,ushuru wa mabango na vitambulisho vya wajasiriamali. Katika utekelezaji wa agizo hili tutaanza kazi hii kwa awamu na awamu ya kwanza itakuwa ni utambuzi wa majengo yanayostahili kulipiwa kodi pamoja na taarifa sahihi za wamiliki wa majengo hayo zikiwa zimesainiwa na Mwenyekiti wa Kijiji husika lengo likiwa ni kuthibitisha usahihi wa taarifa hizo.” “ Haya ni maelekezo ya Serikali na yanaanza kutekelezwa kuanzia leo na mwisho wa zoezi hili la utambuzi ni tarehe 15/02/202.” Alisisitiza.

Aidha amewataka Watendaji wa Vijiji kuhakikisha wanaratibu vikao vya Vijiji kwa mujibu wa miongozo ili kupunguza kero za Wananchi zinazosababishwa na kutofanya Vikao vya kisheria ngazi ya Vijiji.

Pia amewaomba Wenyeviti wa Vijiji kushiriki kikamalifu katika zoezi la utambuzi, na ujenzi wa madarasa unaoendelea katika Vijiji na kata zao hususani katika kuhamasisha ushiriki wa Wananchi pindi wanapohitajika.

Kwa upande wake Mwenyekiti wa Halamshauri Mhe. Juma Ligoma amewataka Wenye Viti wa Halamshauri kusimamia maelekezo hayo na kufanya kazi kwa umoja na mshikamano ili kukamilisha kazi hiyo kwa wakati na kwa ufanisi mkubwa.

Aidha ametumia fursa hiyo kutoa msisitizo juu ya usimamizi wa ujenzi wa mardasa 13 yanayojengwa katika Shule za Sekondari ili kukamilisha kazi hiyo kwa wakati.

 x