MAWAZIRI 5 WA KISEKTA WAFANYA ZIARA YA KUONA MAFURIKO RUFIJI.

Posted on: April 10th, 2024

Mawaziri watano, wa Kisekta wakiongozwa na Waziri wa Nchi Ofisi ya Waziri Mkuu (sera, bunge na uratibu) Mhe. Jenista Mhagama, wamefanya ziara Wilayani Rufiji kwa ajili ya kutoa pole na kujionea hali halisi ya mafuriko yaliyosababishwa na mvua kubwa zinazoendelea kunyesha maeneo mbalimbali nchini.

Kamati hiyo ya maafa ya Kitaifa imefanya ziara hiyo jana Aprili 10, 2024 na kuzungumza na Wananchi katika Kijiji cha Mohoro Mashariki Kata ya Mohoro, ambapo Mhagama alisema mafuriko ya mwaka huu yalitabiriwa na Mamlaka ya hali ya hewa Tanzania (TMA),  toka mwaka jana kuwa nchi yetu itapata mvua za el-nino zitakazoungana na mvua za masika na vuli.

“tunachotakiwa kufanya ni kusikiliza maelekezo ya Serikali” alisema Mhe. Mhagama.

Mhe. Mhagama amesema serikali imeshaleta tani 40 za Mahindi huku tani za unga wa Mahindi, tani za maharage na mafuta ya kupikia zikiwa zipo njiani, na kwamba serikali inaandaa tani zaidi za Chakula na madawa ili kuhakikisha Wananchi wanakuwa salama.

Kwa upande wake, Mkuu wa Wilaya ya Rufiji Meja Edward Gowele, amesema”tuliweza kutoa taarifa mapema na tuliwahamisha Wananchi maeneo ya mabondeni, ndo maana tumeweza kupunguza athari za vifo. Tunamshukuru Mhe. Rais tumeweza kupokea shehena ya vyakula, mahema, na tumeweza kupata madawa ambayo yanaenda kuwasaidia ndugu zetu wasipate magonjwa ya mripuko ” alisema Gowele.

Pia Gowele aliongeza kuwa “lakini pia tunao mpango makakati ambao tayari tumeshauanza wa kuwapa maeneo (wanaokaa maeneo ya mabondeni), tayari katika kijiji cha Mohoro tuna zaidi ya Viwanja 600 ambavyo tushavitenga na tulishawagawia baadhi ya Wananchi” aliongeza Gowele.

Mawaziri wengine waliokuwa katika ziara hiyo ni Waziri wa Ulinzi Mhe. Dkt. Stergomena Tax, Waziri wa Maendeleo ya jamii, Jinsia, Wanwake na Mkundi Maalumu Mhe. Dkt. Dorothy Gwajima, Waziri wa Ardhi Nyumba na Maendeleo ya Makazi Mhe. Jerry Silaa na Waziri wa Maji Mhe. Juma Aweso.

Manaibu Waziri Waliokuwa katika msafara huo ni Naibu Waziri wa Nishati Mhe. Joyce Kapinga, Naibu Waziri wa Kilimo Mhe. David Silinde, Naibu Waziri wa Maliasili na Utalii Mhe. Dunstan Kitandula, Naibu Waziri wa Ujenzi Mhe. Godfrey Kasekenya na Naibu Waziri wa Mambo ya Ndani ya Nchi Mhe. Daniel Sirro.