MARUFUKU KUVAMIA MAENEO YA HIFADHI, KUFANYA SHUGHULI ZA KIBINADAMU

Posted on: July 19th, 2024

Naibu Waziri Ofisi ya Makamu wa Rais Muungano na Mazingira Mhe. Khamis Hamza Khamis, amepiga marufuku kufanya uvamizi na kufanya shughuli za kibinadamu ikiwemo kukata miti, kuni, kufanya ufugaji na kuchoma mkaa katika maeneo ya hifadhi zilizotengwa  huku akiwataka kutunza maeneo hayo kwa ajili ya kukuza uchumi na maendeleo ya Taifa.

"nitoe wito kwa Wananchi wote, niwaambie ni marufuku kwenda kufanya uvamizi na kufanya shughuli za kibinadamu,  shughuli ambazo zinaenda kuharibu na kuchafua mazingira. Kumekuwa na utamaduni wa baadhi ya Watu kwenda kuvua, hasa uvuvi usiokuwa rasmi kwenye maeneo yaliyotengwa na kuwekwa kwa ajili ya shughuli maalum, kuna Watu wanakwenda kufanya shughuli za ufugaji, wengine wanakwenda kukata kuni, kukata miti, kuchoma mkaa kwenye maeneo maalumu yaliyotengwa na kuhifadhiwa"alisema Mhe. Khamis.

Mhe. Khamis alikemea tabia hiyo jana Julai 19, 2024 wakati akihutubia Wananchi kwenye mkutano wa uzinduzi wa hifadhi hai za Rufiji, Kibiti, Mafia na Kilwa (RUMAKI)ambazo sasa zinaingia kwenye mtandao wa hifadhi hai duniani na kutambulika kimataifa uliofanyika katika ukumbi wa Chuo cha Maendeleo ya Wananchi FDC-Ikwiriri.

Uamuzi wa RUMAKI kuwa hifadhi hai ulipitishwa Mei, 2023 katika mkutano mkuu wa kimataifa wa UNESCO uliofanyika Paris- Ufaransa.

Ameeleza kuwa RUMAKI kuwa hifadhi hai kunatoa fursa ya kuunganishwa nguvu katika mtandao wa uhifadhi hai duniani.

Akizungumza kwa niaba ya Mkuu wa Mkoa wa Pwani, Mkuu wa Wilaya ya Rufiji Mhe. Meja Edward Gowele amemshukuru Mhe. Rais wa Jamhuri ya Muungano wa Tanzania Dkt. Samia Suluhu Hassan kwa namna anavyotangaza vivutio vya utalii pamoja na hifadhi hai, hali inayopelekea kuhamasisha uhifadhi na kukuza uchumi wa nchi

"ameweza kuitangaza nchi yetu kimataifa na Tanzania imeweza kuwa kwenye ramani ya dunia. Nichukue fursa hii ndugu Mgeni Rasmi kuhakikishia kwamba sisi Mkoa wa Pwani ikiwemo Wilaya ya Rufiji tutaendelea kuwa washiriki wazuri wa kuendelea kuhifadhi hifadhi hai ambayo tunayo tukiamini itatuletea maenendeleo na kukuza uchumi wa nchi" alisema DC Gowele.