MARUFUKU KUUZIA POMBE ZA KIENYEJI NYUMBANI-DC GOWELE.

Posted on: June 7th, 2024

Mkuu wa Wilaya ya Rufiji Meja Edward Gowele, amepiga marufuku uuzaji wa pombe za kienyeji majumbani, huku akiwataka wafanyabiashara hiyo watafute eneo maalumu litakalojulikana kwa ajili ya biashara yao, ili kuepusha matukio mbalimbali ikiweno mauaji na ubakaji yanayoweza kusababishwa na ulevi.

“kuanzia leo ni marufuku kuuzia pombe za kienyeji nyumbani, nitaruhusu kama mmetafuta eneo maalumu” amesema Gowele.

DC Gowele aliyazungumza hayo wakati akizungumza na Wananchi wa Kitongoji cha Golani Kata ya Chemchem, Mji mdogo wa Utete leo Juni 7, 2024 baada ya eneo hilo kukithiri kwa uuzaji wa pombe za kienyeji majumbani, hali itakayoweza kusababisha mmomonyoko wa maadili kwa watoto nyumbani, na matukio mbalimbali ya kiuhalifu.

Pia Gowele amewataka Wananchi Wilayani Rufiji, kutoa taarifa katika serikali ya Kitongoji au Kijiji endapo wana mashaka na mtu ambaye ni mgeni  na hawamfahamu katika eneo lao, kwa jili ya kuimarisha ulinzi na usalama kwa Wananchi.

Mbali na hayo, Gowele amewaagiza Viongozi wa  Vijiji na Vitongoji kuhakikisha wanaandaa utaratibu wa kufanya usafi katika maeneo yao, ili kuondoa vichaka vitakavyoweza kutumika kama sehemu ya kufanyia uhalifu.