MAFUNZO YA KILIMO CHA MBOGAMBOGA YAANZA RASMI MKONGO.

Posted on: September 14th, 2020

Afisa Kilimo, Umwagiliaji, na Ushirika Wilaya ( DAICO) Ndg. Geriad Ismael Mgoba pamoja na timu ya wataalamu wa Kilimo Wilkaya leo ametembelea kambi ya Vijana ya Kilimo na Maarifa Mkongo ikiwa ni siku ya kwanza ya Mafunzo ya wiki mbili (2) ya Kilimo cha Mbogamboga.Akizungumza na Timu hiyo, Ndg. Dickson Alex Msimamizi wa Kituo cha Mafunzo kilichopo chini ya SUGECO amesema mpaka Sasa kambi imepokea wanafunzi 59 kati ya hao walio ripoti toka Rufiji 16, Mkuranga 04, Kibiti 09, na Kisarawe 30. " Lengo la Mafunzo ni wanafunzi 50 lakini mpaka Sasa tumepata 59." Alisema. Amesema kuwa Mafunzo hayo ya Kilimo yanatolewa bure bila malipo  kwani yamefadhiliwa na Shirika la Chakula Duniani pamoja na Serikali ya Tanzania hivyo Chakula, malazi na Elimu vinatolewa bure.Aidha Ndg. Dickson ameongezea kuwa Mafunzo hayo ambayo hufanyika kwa vitendo 80% na darasani 20% yamekuwa na manufaa makubwa kwa Vijana hasa wa Rufiji kwa kupata Elimu kubwa ya ujasiriamali, uzalishaji Mali, Usimamizi wa mashamba kibiashara, na kuwawezesha kuanzisha makampuni na mashamba yao na kuwapatia kipato watu wengine." Kwa Sasa tumeanza awamu ya kwanza 2020 kwa Kilimo cha Mbogamboga , yatafuatiwa na Mafunzo ya Ufugaji wa kuku, na baadae Ufugaji wa Nyuki. Mafunzzo haya yataenda kwa awamu tano mfululizo kwa Vijana tofauti." Msimamizi huyo alimalizia kwa kutoa Ushauri kwa Vijana wa Halmashauri ya Wilaya ya Rufiji kutumia kituo hiki kama sehemu ya kujifunzia hasa Kilimo cha kisasa kwa kutumia kitalu Nyumba, tekinolojia ya Umwagiliaji, Ufugaji. Akizungumza na Vijana kambini hapo Afisa Kilimo, Umwagiliaji na Ushirika amewapongeza Vijana waliochangamkia fursa ya kwenda kujifunza kambini hapo na kuongezea kuwa Kilimo sio kazi ya Utumwa bali ni kazi inayoweza kuleta utajiri Mkubwa. " Ninaamini mtajifunza vizuri na pale ambapo mtakutana na Changamoto tuwasiliane. Tumepataa Mkuu wa Wilaya anayependa Kilimo, Tunaamini Vijana watajaa mpaka tushindwe pa kuwaweka"