MADIWANI WASHAURI SERIKALI ZA VIJIJI ZIONGEZEWE NGUVU KUKABILIANA NA WAFUGAJI WAVAMIZI.

Posted on: February 19th, 2024

Siku chache baada ya Mkuu wa Wilaya ya Rufiji kufanya Mkutano wa Wakulima na Wafugaji Katika kata ya Umwe- Ikwiriri Februari 9, 2024 wenye lengo la kusikiliza na kutatua kero zao, Madiwani Wilayani Rufiji wameomba serikali za vijiji ziongezewe nguvu pale wanapoomba msaada juu ya matatizo ya Wakulima na Wafugaji ili waweze kusaidiwa kwa haraka ili kupunguza migogoro.

Ombi hilo liliwasilishwa leo Februari 19, 2024 na Diwani wa Kata ya Mbwara Mhe. Juma Ligomba katika kikao cha kuwasilisha utekelezaji wa shughuli za maendeleo ya Kata kwa robo ya pili ya mwaka 2023/ 24 uliofanyika katika ukumbi wa Halmashauri ya Wilaya ya Rufiji.

Amesema licha ya kazi kubwa inayofanywa na Kamati ya ulinzi na usalama wa kuhakikisha wanadhibiti tatizo hilo pia kuna haja ya kutoa msaada wa haraka kwa serikali ya Vijiji pale wanapohitaji masaada kutoka kwa kamati hiyo.

 “Mheshimiwa Mwenyekiti changamoto hii imeshakuwa kubwa sana, tunafahamu Mkuu wa Wilaya anafanyakazi kubwa na kamati ya ulinzi na usalama kuhakikisha wanawaondoa Wafugaji wanaoingia katika mashamba ya Wakulima.

“naomba Mheshimiwa Mwenyekiti tuangalie namna ya kuzisaidia serikali zetu za vijiji ili inapotokea changamoto (kwa maana ya kuomba msaada wowote inapotokea) waweze kusaidiwa ili kumaliza tatizo” alisema.

Katika kikao cha Wakulima na Wafugaji Februari 9, 2024 Mkuu wa Wilaya ya Rufiji Meja Edward Gowele alisema ameunda vikosi kazi vinne kwa ajili ya kukabiliana na tatizo hilo.

Alisema ameunda vikosi katika ukanda wa Mwaseni, Ikwiriri, Muhoro na Utete.

Akizungumzia suala hilo Mwenyekiti wa Halmashauri ya Wilaya ya Rufiji Mhe. Abdul Chobo amesema kama Madiwani waliidhinisha bajeti kwa ajili ya kukabiliana na changamoto hiyo hivyo wataendelea Kushirikiana na vyombo vya ulinzi na usalama.

“sisi Waheshimiwa Madiwani bajeti hii ambayo tunakwenda nayo ya mwaka 2023/24 tuliidhinisha kifungu cha fedha kwa ajili ya kukabiliana na jambo hilo, nilihakikishie baraza  tutaendelea kushirikiana na vyombo vya ulinzi na usalama na kufuatilia kule ambako kuna changamoto kubwa tuongeze nguvu ili kuweza kuhakikisha ulinzi na usalama. Lakini pia hata mwaka huu tumetoka kupitisha bajeti na suala hilo tumelizingatia”.amesema Abdul Chobo.