MADIWANI RUFIJI WAPATIWA MAFUNZO KUJENGEWA UWEZO

Posted on: June 2nd, 2022

Halmashauri ya Wilaya ya Rufiji imewezesha utoaji wa Mafunzo ya siku tatu yanayolenga kujenga uwezo kwa Madiwani hasa katika utekelezaji wa Majukumu yao.Akifungua Mafunzo hayo kwa niaba ya Mkuu wa Mkoa wa Pwani Mkuu wa Wilaya ya Rufiji Meja Edward Gowele ametoa pongezi kwa Mkurugenzi Mtendaji wa Halmashauri hiyo kwa kuona umuhimu wa mafunzo hayo na kuongeza kuwa mafunzo hayo yatajenga uwezo katika utekelezaji na ufuatiliaji pamoja na usimamizi wa shughuli za maendeleo zinazotekelezwa ndani ya halmashauri ili kuwaletea Wananchi maendeleo  .“ Ni matumaini yangu kuwa mafunzo haya yataifanya Rufiji izidi kupaa kimaendeleo kama ilivyodhamira ya Mhe. Rais  ya kuwaondolea wananchi changamoto na kuwaletea ustawi.” Alisema Gowele.Sambamba na hayo, amewataka madiwani kuendelea kusimamia miradi ya maendeleo katika Kata zao pamoja na kusimamia ukusanyaji wa mapato.Awali akitoa taarifa ya utangulizi Kaimu Mkurugenzi Mtendaji wa Halmashauri Salim Msuya ameeleza kuwa mafunzo hayo yamejikita katika kuwajengea uwezo madiwani katika kufahamu kwa kina Mfumo wa Serikali za mitaa, Wajibu an Majukumu ya Diwani, Uandaaji wa bajeti, usimamizi,na utekelezaji, Makusanyo ya Mapato katika mamlaka za Serikali za mitaa,ufuatiliaji na udhibiti wa fedha za umma, maadili ya viongozi wa umma pamoja na utawala bora na mapambano dhidi ya Rushwa ikiwemo ulinzi na usalama pamoja na uhamiaji.Kwa upande wake Mwenyekiti wa Halmashauri  ya Wilaya ya Rufiji Mhe. Juma Ligomba ametoa shukrani kwa niaba ya Madiwani kwa kukubali kuwezesha mafunzo hayo licha ya mafunzo hayo kutokuwepo kwenye bajeti.