MADAWATI 576 KUBORESHA MIUNDOMBINU YA ELIMU

Posted on: February 17th, 2022

Mkuu wa Wilaya ya Rufiji Meja Edward Gowele amekabidhi madawati 100 kwa Mwalimu Mkuu shule ya Msingi Kilimani na kumtaka kuyatunza madawati hayo ili yaendelee kutoa ari ya usomaji kwa wanafunzi \Awali, akitoa taarifa fupi ya uboreshaji wa miundombinu ya shule za msingi kwa niaba ya Mkurugenzi Mtendaji wa Halmashauri, Afisa Elimu Msingi Wilaya ya Rufiji Edward Buganga amesema, Halmashauri ya Wilaya ya Rufiji Imetoa jumla ya shilingi Milioni 34.6 mapato ya ndani kutengeneza madawati 576 ambapo kati ya madawati hayo madawati 100 yamekamilika na mengine yakiwa katika hatua ya ukamilishaji huku tenda zikiwa zimetolewa kwa vikundi mbalimbali vya mafundi wilayani humo. 
Aidha Mhe. Gowele ametoa shukrani kwa mdau wa elimu ambaye amejitolea usafiri kusafirisha madawati hayo toka ikwiriri hadi shuleni na kutoa wito kwa wadau wengine wa maendeleo kuendelea kushirikiana na jamii za wanarufiji kuchangia katika shughuli za maendeleo.
“Tunamshukuru sana mdau wa maendeleo toka kilimani kwa kujitoa kusafirisha madawati haya 100 bure hadi shuleni. Na nitoe wito kwa wadau wengine kuiga mfano huu kwa kushirikiana na wananchi kuchangia katika shughuli za maendeleo” alisema Gowele 
Kwa upande wake Mwalimu Mkuu wa sule hiyo ameishukuru serikali kwa namna ambavyo inaendelea kuboresha miundombinu ya elimu na kueleza kuwa madawati hayo yanaenda kupunguza kwa kiasi kikubwa  changamoto ya upungufu wa madawati.
“ Shule ya msingi kilimani inajumla ya wanafunzi 1554 ambapo awali tulikuwa na upungufu wa madawati 172 hivyo madawati haya 100 yatapunguza changamoto ya madawati kiasi kikubwa“ alisema