KILA MMOJA AWE MLINZI WA MIRADI YA MAJI- WAZIRI AWESO

Posted on: January 27th, 2024

Waziri wa Maji Juma Aweso, amewataka Wananchi wa Rufiji Mkoani Pwani kuilinda na kuitunza miradi ya Maji inayotekelezwa katika maeneo yao kwa faida ya vizazi vya sasa na baadae.

Waziri Aweso amesema wapo baadhi ya Watu wasiopenda maendeleo wamekuwa wakiharibu miundombinu kwa kuvunja mabomba ya Maji

"tumeshuhudia baadhi ya maeneo, tunajenga mradi, Watu walikuwa na shida ya Maji, lakini wakati mwingine mtu akigombana na mkewe hasira zake anakuja kuvunja bomba la Maji. Sasa kila mmoja awe mlinzi kwa mwenzake, kuhakikisha mradi huu ambao Rais ameweka fedha nyingi unakuwa na faida ya vizazi vya sasa na baadae" amesisitiza Waziri Awesu

Awesu ameyazungumza hayo Januari 27, 2024  kwenye mkutano wa hadhara na Wananchi wa Kijiji cha Chumbi A, Kata ya Chumbi Wilayani Rufiji, alipokwenda kuzindua mradi wa Maji wenye thamani ya shilingi Ml. 722 ambao utahudumia Wakazi 8664 wa Kata ya Chumbi.

Kwaupande wake, Mkuu wa Mkoa wa Pwani Abubakari Kunenge amempongeza Waziri huyo kwa kufika Chumbi na kuzindua mradi huo ambao utasaidia kuwapunguzia adha Wananchi ya kwenda kutafuta Maji umbali mrefu.

Katika hatua nyingine, akizungumza kwa niamba ya Mkuu wa Wilaya ya Rufiji, Mkuu wa Wilaya ya Mkuranga Khadija Nasri amemuomba Waziri wa Maji kuanzisha Mamlaka ya Maji taka katika Mkoa wa Pwani.

"sisi Mkoa wa Pwani hatuna Mamalaka za Maji taka, naomba ulichukua hili ili kuangalia namna ya kuanzisha Mamalaka za Maji taka ili kuhakikisha jamii zetu ziko salama" ameomba Nasri.

Akitoa shukrani za Wananchi wa Chumbi Diwani wa Kata hiyo, Ally Nguyu, ameishukuru Serikali kwa kutekeleza mradi huo Chumbi ambao utapunguza kero ya maji katika kata yake.