KERO YA MAJI MIANGALAYA YABAKI HISTORIA

Posted on: March 30th, 2025

Wananchi wa Kitongoji Cha Miangalaya, Kijiji cha Nambunju Kata ya Mbwara Wilayani Rufiji Mkoani Pwani, wameendelea kutoa shukrani kwa Serikali ya awamu ya Sita chini ya Mhe. Dkt.  Samia Suluhu Hassan Rais wa Jamhuri ya Muungano wa Tanzania pamoja na Mbunge wa Jimbo la Rufiji na Waziri wa Nchi Ofisi ya Rais TAMISEMI Mhe. Mohammed Mchengerwa, baada ya kujengewa mradi wa Maji na kutatua kero ya upatikanaji wa Maji safi na salama iliyokuwa ikiwakabili kwa muda mrefu, ikiwa ni ahadi ya Mbunge ya kumaliza tatizo hilo.

Haya yamedhihirishwa na Mwenyekiti wa Kitongoji Cha Miangalaya Bw. Bakari Muba maarufu (Bolwe) Wakati akishuhudia pamoja na Wanafunzi zoezi la kujengwa kwa Miundombinu ya maji katika shule ya Msingi Miangalaya iliyopo Kijiji Cha Nambunju Kata ya Mbwara, ambapo awali  wanafunzi na Wananchi hao walilazimika kutembea umbali wa zaidi ya kilometa 5 kutoka katika Kitongoji Cha Miangalaya kilichopo mpakani  mwa Wilaya ya Rufiji na Kilwa kufuata maji safi na salama katika eneo la Nambunju (Makao makuu ya Kijiji).

"... tunapokea mradi huu wa maji ambao RUWASA wametuunganishia ambao ni ahadi ya Mheshimiwa Mbunge toka mwaka 2017  kwamba tulimuomba mradi wa maji ufike  katika eneo la shule ya Msingi miangalaya, na Leo wanafunzi wanafurahia kwa maana walikuwa wakipata adha kubwa katika kipindi chote hiki Cha masomo walikuwa wanapata shida ya Maji. Kwahyo leo tumefanikiwa kupata mradi huu, kwa maana tunamshukuru Mheshimiwa Rais, Mbunge pamoja na Mheshimiwa Diwani lakini bila kusahau Wazee na Wananchi kwa Ujumla." Alieleza Bolwe.

Itakumbukwa kuwa shule ya Msingi Miangalaya ilijengwa kutoka kwenye kituo shikizi kilichokuwa na darasa Moja lililojengwa na Wananchi kwa kutumia udongo na miti ambapo mwaka 2018  kituo hicho kilipelekewa mifuko ya sementi na fedha ya ujenzi wa vyumba viwili vya madarasa toka kwa Mbunge, na Mwaka 2021 walipokea fedha milioni 40 kwa ajili ya ujenzi wa vyumba viwili vya madarasa na ofisi, vyoo matundu manne iliyogharimu kiasi cha Shilingi milioni 4.4, matundu sita ya vyoo yaliyojengwa kwa Shilingi milioni 6.5 na kupelekea kituo hicho kuwa na usajili kamili wa Shule ya Msingi Miangalaya.

Hata hivyo Shule hiyo hivi Sasa imepokea Shilingi millioni 95 kwa ajili ya ujenzi wa nyumba ya Walimu ( 2 in 1).