KAMATI YA DCC RUFIJI YAPITISHA BIL. 40.9 YA MAPENDEKEZO YA RASIMU YA MAKISIO YA BAJETI YA HALMASHAURI

Posted on: February 12th, 2026

Kikao cha Kamati ya Ushauri Cha Wilaya (DCC), kimeidhinisha mapendekezo ya rasimu ya mpango na bajeti ya Halmashauri ya Mji Rufiji kwa mwaka wa fedha 2026/2027 yenye Jumla ya Shilingi 40, 961, 397,000.00 kwa ajili ya utekelezaji wa Shughuli mbalimbali za Halmashauri ikiwemo kutatua kero mbalimbali na kupeleka huduma karibu zaidi na Wananchi.

Rasimu hiyo ya bajeti  imepitishwa jana Februari 12, 2026 katika kikao Maalumu Cha Kamati ya Ushauri ya Wilaya ya Rufiji DCC, Cha kujadili rasimu ya mpango wa bajeti ya mwaka wa fedha 2026/2027 ya Halmashauri ya Mji.

Akiwasilisha taarifa ya mapendekezo hayo, Mkuu wa Divisheni ya Mipango na uratibu Halmashauri ya Mji Rufiji Bw. Pius Magoti amesema mapendekezo ya bajeti hiyo itatumika katika utekelezaji wa miradi mbalimbali ya maendeleo ikiwemo Miradi ya elimu na Afya hali itakayorahisisha upatikanaji wa huduma kwa Wananchi.

Akizungumza baada ya kupokea taarifa hiyo, Mkuu wa Wilaya ya Rufiji Mhe. Luteni Kanali Fredrick Komba alisisitiza kuwa mapendekezo ya  bajeti hiyo yalenge kutumika kama ilivyokusudiwa pamoja na utoaji wa mikopo ya asilimia 10 kwa ajili ya Vijana Wanawake na Watu wenye ulemavu.

Kwa upande wake, Mwenyekiti wa Halmashauri aliiomba Kamati hiyo kuwa na ushirikiano katika kudhibiti upotevu wa mapato ya Halmashauri, na kuhakikisha mapato yanakusanywa kwa wingi Ili Serikali iweze kutoa huduma nzuri kwa Wananchi, huku akisisitiza umuhimu wa urudishwaji wa mikopo ya asilimia 10 ili ziweze kuhudumia Wananchi wengine.